Арсенал Чемпионлар лигаси ярим финалида Атлетико Мадрид устидан 1:0 ҳисобида ғалаба қозониб, финал йўлланмасини қўлга киритди. Икки ўйин натижасига кўра 2:1 ҳисобида устун келган Микел Артета шогирдлари 20 йиллик танаффусдан сўнг мусобақанинг ҳал қилувчи босқичига чиқишди. Бу ҳақда Goal.com хабар беради.
Микел Артета учрашув тақдирини ҳал қилган Букайо Сака ҳақида илиқ фикрлар билдирди. "У жуда ўзига хос футболчи. Агар кимдир ғалаба голини уриши керак бўлса, бу айнан Сака бўлиши керак эди", — деди мураббий Amazon Prime нашрига берган интервюсида.
Шунингдек, жамоанинг янги ҳужумчиси Виктор Гёкерес ҳам мураббий томонидан юқори баҳоланди. Артета швециялик футболчининг майдондаги меҳнаткашлиги ва жамоавий ҳимоядаги фаоллигини алоҳида таъкидлаб, унинг ўйинини "улкан" деб атади.
Ўйин олдидан Микел Артета таркибга кирмаган футболчилар билан суҳбатлашиб, улардан узр сўраганини тан олди. Мураббийнинг сўзларига кўра, футболчиларнинг профессионал муносабати ва бир-бирини қўллаб-қувватлаши Арсеналнинг жорий мавсумдаги муваффақиятларининг асосий омилига айланган.
“Zamin”ни Telegram'да ўқинг!
