Мюнхеннинг Бавария клуби PSJ ҳужумчиси Хвича Кварацхелиянинг укаси Торнике Кварацхелияга қизиқиш билдираётганини расман тасдиқлади. 16 ёшли иқтидорли футболчи яқинда Германия клубининг ёшлар академиясида машғулотларда иштирок этиб, мураббийлар штабида яхши таассурот қолдирди. Бу ҳақда Goal.com хабар беради.
Бавария спорт директори Кристоф Фройнд ёш футболчининг клуб базасида бўлганини тасдиқлаб, унинг иқтидорли эканини таъкидлади. Фройнднинг сўзларига кўра, Торникени акаси Хвича билан солиштиришга ҳали эрта, аммо клуб унинг ривожланиш жараёнини диққат билан кузатиб боради.
Торнике Кварацхелия Бавариянинг 17 ёшгача бўлган жамоаси сафида ўртоқлик учрашувида майдонга тушиб, гол уришга ҳам муваффақ бўлди. Ҳозирда Динамо Тбилиси таркибида бўлган ёш футболчи ўзининг техник маҳорати билан мутахассислар эътиборини тортмоқда.
FIFA қоидаларига кўра, Европа Иттифоқига аъзо бўлмаган мамлакат фуқароси сифатида Торнике 18 ёшга тўлмагунига қадар Германия клуби билан расмий шартнома имзолай олмайди. Шу сабабли, Бавария уни ривожлантириш учун ҳамкор клублардан бирига ижарага бериш вариантини кўриб чиқмоқда.
“Zamin”ни Telegram'да ўқинг!
