Реал Мадрид машғулотларида Аурелиен Тчоуамени ва Федерико Вальверде ўртасида юз берган тўқнашув жамоада жиддий шов-шувга сабаб бўлди. Машғулот вақтида бошланган келишмовчилик кийиниш хонасида давом этиб, уругвайлик ярим ҳимоячининг жароҳат олиши билан якунланди. Натижада Вальверде бош қисмидаги жароҳат сабабли шифохонага ётқизилди ва бир неча тикув қўйилди. Бу ҳақда Goal.com хабар беради.
Аурелиен Тчоуамени юз берган воқеа юзасидан оммавий узр сўради. У ўз баёнотида бундай хатти-ҳаракатлар Реал Мадрид каби дунёнинг энг машҳур клуби вакилларига ярашмаслигини ва ёшлар учун ёмон ўрнак бўлишини таъкидлади. Футболчи клуб томонидан белгиланган жаримани тўлиқ қабул қилишини маълум қилди.
Тиббий кўрик натижаларига кўра, Федерико Вальверде 10 кундан 14 кунгача дам олиши керак. Бу эса унинг яқинлашиб келаётган Эл-Класико баҳсини ўтказиб юборишини англатади. Клуб раҳбарияти ҳар икки футболчини 500 минг евро миқдорида жаримага тортди ва ички интизомий ишни ёпилган деб эълон қилди.
Федерико Вальверде ижтимоий тармоқлардаги саҳифасида ушбу воқеа жамоа ичида ҳал қилиниши керак бўлган ҳолат эканлигини, бироқ кимдир уни матбуотга ошкор қилганидан афсусдалигини билдирди. Унинг сўзларига кўра, жамоаларда бундай келишмовчиликлар учраб туради, аммо ҳозирги вазиятда воқеа ҳаддан ташқари бўрттириб юборилган.
“Zamin”ни Telegram'да ўқинг!
