«Наполи» клубида мавсум якунидан кейин мураббийлик масаласида жиддий ўзгаришлар бўлиши мумкин. Италия матбуоти хабарларига кўра, бош мураббий Антонио Конте мавсум тугагач Неапол клубини тарк этиш эҳтимоли бор.
calcionapoli1926.it нашри маълумотига кўра, «Наполи» президенти Аурелио Де Лаурентис аллақачон Контенинг ўрнини босиши мумкин бўлган бир нечта номзодни кўриб чиқмоқда. Клуб раҳбарияти эҳтимолий ўзгаришларга олдиндан тайёргарлик кўраётгани айтилмоқда.
Асосий номзод сифатида Маурицио Сарри номи тилга олинмоқда. У аввал ҳам «Наполи»да ишлаган ва жамоага ўзига хос ўйин услубини олиб кирган мутахассис сифатида яхши танилган. Саррининг Неаполга қайтиши мухлислар орасида катта қизиқиш уйғотиши мумкин.
Иккинчи номзод — Винченцо Италяно. Италиялик шарҳловчиларнинг фикрича, у сўнгги йилларда мураббий сифатида анча ўсди ва энди топ-клубда ишлашга тайёр даражага етди. Унинг ҳужумкор футболга мойиллиги ва жамоа қуришдаги ёндашуви «Наполи» учун қизиқ вариант бўлиши мумкин.
Шунингдек, клуб раҳбарияти Фабио Гроссо номзодини ҳам кўриб чиқмоқда. Собиқ футболчи сифатида катта тажрибага эга бўлган Гроссо мураббийлик фаолиятида ҳам ўзини кўрсатишга ҳаракат қилмоқда.
Эслатиб ўтамиз, Антонио Конте ўтган йили «Наполи» билан Италия чемпионлигига эришган эди. Жорий мавсумда эса неаполликлар А Серияда 2-ўринда бормоқда. Шунга қарамай, клуб ичида келажак режалари бўйича турли фикрлар пайдо бўлгани тахмин қилинмоқда.
Қисқаси, «Наполи»да ёзда мураббийлик интригаси кучайиши мумкин. Конте кетадими ёки қоладими — ҳозирча аниқ эмас. Аммо Де Лаурентис эҳтимолий сценарийларга тайёр кўринади. Неаполда футбол тинч ухламайди, бу ерда ҳар мавсум янги сериал.
“Zamin”ни Telegram'да ўқинг!
