“Манчестер Сити” бош мураббийи Хосеп Гвардиола клубдаги 10 йиллик фаолияти давомидаги энг катта афсуси ҳақида гапирди. Испаниялик мутахассис Sky Sports’га берган интервьюсида собиқ дарвозабон Жо Ҳартга ўзини кўрсатиш учун етарли имконият бермаганини тан олди.
“Мен бир нарсани тан олмоқчиман. Ич-ичимда фақат битта афсус бор — Жо Ҳартга ўзини кўрсатиш учун имкон бермадим. Мен буни қилишим керак эди. Баъзида инсон хато қилади”, — деди Гвардиола.
Жо Ҳарт Пеп “Манчестер Сити”га келганидан кейин асосий таркибдаги ўрнини йўқотган эди. Ўша пайтда Гвардиола дарвозабондан тўп билан ўйнаш, ҳужумни орқадан бошлаш ва позицион футбол талабларига мос ҳаракат қилишни истаган. Ҳарт эса клубнинг аввалги йилларида асосий посбонлардан бири бўлганига қарамай, янги мураббий тизимида имконият ололмади ва жамоани тарк этишга мажбур бўлди.
“Манчестер Сити”дан кетганидан кейин англиялик дарвозабон фаолиятини “Торино”, “Вест Ҳэм”, “Бёрнли”, “Тоттенҳэм” ва “Селтик” клубларида давом эттирди. У 2024 йилда профессионал футболчилик фаолиятини якунлади.
Гвардиоланинг бу эътирофи мухлислар учун қизиқ жиҳатга эга. Чунки Пеп одатда қарорларида қатъийлиги, тактик талабларидан қайтмаслиги ва футболчилардан тизимга мослашишни талаб қилиши билан танилган. Аммо бу сафар у ўша қарорлардан бири бўйича инсон сифатида хато қилганини очиқ айтди.
Маълумот учун, Хосеп Гвардиола “Манчестер Сити”ни 2016 йилдан буён бошқариб келмоқда. У клуб билан улкан совринлар қўлга киритди, жамоани Европа футболидаги энг кучли тизимлардан бирига айлантирди. Бироқ ушбу мавсум якунида испаниялик мутахассис “шаҳарликлар”ни тарк этади.
Қисқаси, Гвардиола “Сити”даги буюк даврида ҳам афсусли қарорлар бўлганини яширмади. Жо Ҳартга имконият бермагани унинг хотирасида қолган ягона оғриқли нуқта экан. Буюк мураббий ҳам баъзан хато қилади — фарқи шундаки, у буни йиллар ўтиб тан олишга ҳам куч топади.
“Zamin”ни Telegram'да ўқинг!
