Аргентина терма жамоаси бош мураббийи Лионель Скалони жамоа сардори Лионель Месси 2026-йилги жаҳон чемпионати олдидан йиғинга тўлиқ спорт формасида етиб келмаслигини тан олди. Интер Миами юлдузи MLS доирасидаги сўнгги учрашувда тиззасининг орқа қисмидаги мушакларидан жароҳат олган эди. Бу ҳақда Goal.com хабар беради.
Саккиз карра "Олтин тўп" соҳиби "Филадельфия Юнион"га қарши кечган драматик баҳсда захирага олинди. Дастлабки тиббий кўриклар жароҳат ўта жиддий эмаслигини кўрсатган бўлса-да, Скалони футболчининг ҳолати 100 фоиз идеал эмаслигини тасдиқлади. Мураббийнинг сўзларига кўра, энди қўшимча тестлар натижасини кутиш лозим.
Интер Миами клуби сардорнинг чап оёғидаги мушак толиқиши туфайли ноқулайлик ҳис қилаётганини маълум қилди. Шунга қарамай, мураббийлар штаби Лионель Месси 16-июн куни Жазоирга қарши кечадиган гуруҳ босқичининг илк ўйинига қадар сафга қайтишига умид қилмоқда.
Аргентина терма жамоасида фақат Месси билан боғлиқ муаммолар эмас, балки бошқа етакчиларнинг жароҳатлари ҳам ташвиш уйғотмоқда. Хусусан, Тоттенхем ҳимоячиси Кристиан Ромеро тиззасидан жароҳат олган бўлса, Атлетико Мадрид аъзоси Наҳуел Молина мушаклари билан боғлиқ муаммоларга дуч келган.
Шунингдек, дарвозабон Эмилиано Мартинез қўл бармоғидаги синиш билан курашмоқда. Скалони 2-июнга қадар якуний таркибни эълон қилиши керак, бироқ асосий ўйинчиларнинг тикланиш жараёни мураббий учун жиддий бош оғриғига айланган.
“Zamin”ни Telegram'да ўқинг!
