Бразилия терма жамоаси юлдузи Неймар ўзининг навбатдаги жароҳати 2026-йилги Жаҳон чемпионатидаги иштирокига хавф туғдириши борасидаги гап-сўзларни рад этди. Ҳужумчи сешанба оқшомида Сантос жамоасининг Копа Судамерикана доирасидаги "Депортиво Куенка"га қарши ўйинини трибунадан кузатиб борди ва у ерда болдиридаги муаммо бўйича саволларга дуч келди. Бу ҳақда Goal.com хабар беради.
Неймарнинг "Вила Белмиро" стадионида кўриниш бериши маҳаллий мухлисларни хурсанд қилган бўлса-да, журналистлар эътибори унинг жисмоний ҳолатига қаратилди. Футболчи яқинда "Куритиба"га қарши баҳсда болдир мушаклари шишиши (эдема) туфайли майдонни тарк этган эди. Бразилия терма жамоаси йиғинига боришдан олдин ўзини қандай ҳис қилаётгани ҳақидаги саволга 34 ёшли юлдуз кескин жавоб берди.
"Ҳаммаси жойида, ҳаммаси бутун", — дея иқтибос келтиради ESPN Бразил нашри Неймарнинг сўзларидан. ОАВ вакиллари собиқ Барселона ва PSJ юлдузини қистовга олиб, ушбу жароҳат ёзги Жаҳон чемпионатидаги иштирокига тўсқинлик қилиши мумкинми деб сўрашганида, у қисқа қилиб: "Муаммо нимада?" дея қарши савол ташлади.
Неймар оптимистик кайфиятда бўлса-да, Бразилия терма жамоаси тиббий штаби эҳтиёткорлик чораларини кўрмоқда. Карло Анселотти ва унинг жамоаси ҳужумчи Тересополисдаги "Гранжа Комари" базасига етиб келганидан сўнг, у учун махсус машғулотлар дастурини жорий этиши кутилмоқда. Шифокорлар турнир олдидан жароҳат оғирлашиб кетмаслиги учун барча чораларни кўришади.
Маълумот учун, Касемиро сешанба куни терма жамоа ихтиёрига етиб келган биринчи футболчи бўлди. Неймар эса чоршанба куни жамоага қўшилиши ва индивидуал тикланиш жараёнини бошлаши режалаштирилган.
“Zamin”ни Telegram'да ўқинг!
