Атлетико Мадрид раҳбарияти жамоа ҳужумчиси Хулиан Альвареснинг ёзги трансфер ойнасида Барселона сафига ўтиши ҳақидаги хабарларни кескин рад этди. Метрополитано мутасаддилари давом этаётган миш-мишлардан чарчаганликларини билдириб, футболчи сотилмаслигини расман маълум қилишди. Бу ҳақда Goal.com хабар беради.
Клуб расмийлари Каталония клуби билан ҳеч қандай расмий ёки норасмий алоқалар, учрашувлар ёки таклифлар бўлмаганини тасдиқлади. Манчестер Сити жамоасидан келганидан бери Мадрид клубининг асосий фигураларидан бирига айланган 26 ёшли ҳужумчи жамоанинг узоқ муддатли режаларида муҳим ўрин тутади.
МАРКА нашри хабарига кўра, Атлетико Мадрид раҳбарлари трансфер ойнаси бошида ОАВда тарқалаётган асоссиз хабарлардан ғазабда. Клуб баёнотида шундай дейилади: “Ўйинчимиз учун ҳеч қандай таклиф бўлмади, учрашув ҳам ўтказилмади. Биз ойлардан бери давом этаётган ёлғонлар, ярим ҳақиқатлар ва футболчиларимизга нисбатан уюштирилган кампаниялардан чарчадик”.
Клуб мутасаддилари ушбу миш-мишларда аргентиналик футболчининг айби йўқлигини, у доимо ўзини профессионал даражада тутаётганини таъкидлади. Хулиан Альвареснинг Атлетико Мадрид билан 2030-йил июнига қадар шартномаси мавжуд бўлиб, у якунланган мавсумда Ла Лига ва Чемпионлар лигаси доирасида 18 та гол уришга муваффақ бўлди.
Барселона Роберт Левандовски ўрнига муносиб номзод қидираётган бўлса-да, Атлетико Мадрид ўзининг 95 миллион евролик юлдузини сақлаб қолишига ишончи комил. Пойтахт клуби ўзининг етакчи футболчиларини розиликсиз қўйиб юбормаслик борасида қатъий позицияда турибди.
“Zamin”ни Telegram'да ўқинг!
