Италия футболи афсонаси Андреа Piрло Микел Артета томонидан Арсенал жамоасида шакллантирилган тактик ёндашувни юқори баҳолади. Мутахассиснинг фикрича, Лондон клуби фақатгина стандарт вазиятлар ва қанотдан узатмаларга таянадиган жамоа эмас, балки ўзига хос ўйин услубига эга бўлган кучли коллективдир. Бу ҳақда Goal.com хабар беради.
Чемпионлар лигаси финали олдидан Пари Сен-Жермен жамоасига қарши баҳсга тайёргарлик кўраётган Арсенал танқидлар нишонида қолган эди. Баъзи экспертлар Артетанинг ўйинини ҳаддан ташқари прагматик ва зерикарли деб аташган бўлса-да, Милан ва Ювентус собиқ юлдузи бу фикрларга қўшилмаслигини билдирди.
"Менга бу услуб ёқади, чунки ҳаммаси фақат бурчак тўплари ёки жарима майдончаси ичига узатмалардан иборат эмас. Артета бир неча йилдан бери ўзининг махсус ўйин услубини ривожлантириб келмоқда. У ҳар бир детални синчиклаб ўрганади ва жуда иқтидорли мураббий ҳисобланади. Англия Премер-лигасида ғолиб чиқиш ва финалга етиб келиш — улкан ютуқ", — дея Piрлонинг сўзларини келтирмоқда Marca нашри.
Piрло, шунингдек, Арсенал ҳимоясининг мустаҳкамлигини алоҳида таъкидлаб ўтди. Унинг сўзларига кўра, жамоанинг икки марказий ҳимоячиси жуда кучли ва бу бутун таркибга ишонч бағишлайди. PSJ таркибида индивидуал маҳорат эвазига ўйин тақдирини ҳал қила оладиган футболчилар кўп бўлса-да, Арсенал жамоавий бирдамлик эвазига устунликка эришиши мумкин.
Микел Артета энди ўз фаолиятидаги энг муҳим учрашувлардан бирига тайёргарлик кўрмоқда. Будапештда бўлиб ўтадиган финал баҳсида у Луис Энрике бошқарувидаги PSJга қарши тактик жанг олиб боради. Бу учрашув Лондон клубининг Европа майдонларидаги муваффақиятини якунлаб бериши кутилмоқда.
“Zamin”ни Telegram'да ўқинг!
