“Арсенал” ярим ҳимоячиси Кай Хавертц Чемпионлар лигаси финали олдидан жамоасининг имкониятлари ҳақида фикр билдирди. Лондон клуби 30 май куни Европанинг энг нуфузли турнири ҳал қилувчи баҳсида ПСЖга қарши майдонга тушади.
Германиялик футболчининг таъкидлашича, финал олдидан ким фаворит, ким андердог экани катта аҳамиятга эга эмас. У ПСЖ ўтган мавсум Чемпионлар лигасида ғолиб чиққанини ва бу йил ҳам кучли ўйин кўрсатганини тан олди. Аммо Хавертц “Арсенал” ҳам бу даражага тасодифан етиб келмаганини таъкидлади.
“ПСЖ ўтган йили Чемпионлар лигасини ютган, демак улар ўша мавсумда Европанинг энг кучли жамоаси бўлган. Бу йил ҳам ажойиб мавсум ўтказишди. Аммо бизда ҳам жуда катта ишонч бор”, — деди Хавертц.
“Арсенал” учун бу финал тарихий аҳамиятга эга. Лондон клуби Чемпионлар лигаси финалига иккинчи марта чиқмоқда. Жамоа сўнгги йилларда Микел Артета қўл остида барқарор ўсишга эришди ва яқинда Англия Премьер-лигасида чемпионликни қўлга киритди. Хавертцнинг фикрича, бу муваффақият футболчиларга қўшимча руҳий куч беради.
“Бир неча йилдан бери энг юқори даражада курашяпмиз ва ниҳоят Премьер-лигада ғолиб бўлдик. Менимча, бу ҳам бизга катта туртки беради”, — дея қўшимча қилди у.
Ҳавертц финалда “Арсенал” ўз кучига ишониб майдонга тушишини айтди. Унинг фикрича, бундай ўйинларда ортиқча ҳисоб-китоблар эмас, характер, ишонч ва майдондаги ҳаракат ҳал қилувчи аҳамият касб этади.
“Сен андердогсанми ёки йўқми — бунинг аҳамияти йўқ. Биз майдонга чиқамиз ва уларни мағлуб этамиз. Олға!” — деди “Арсенал” футболчиси.
Қисқаси, Кай Хавертц Чемпионлар лигаси финали олдидан “Арсенал” ғалабасига ишонч билдирмоқда. ПСЖ амалдаги чемпион бўлса-да, лондонликлар ўз кучига ишонмоқда. Финалда эса статуслар эмас, майдонда ким қаттиқроқ “ёниши” ҳал қилади.
“Zamin”ни Telegram'да ўқинг!
