Профессионал бокснинг ярим енгил вазн тоифасида фаолият олиб бораётган ўзбекистонлик чарм қўлқоп устаси Абдумалик Халоков келгуси режалари ҳақида гапирди. Олимпиада чемпиони катта мақсадлар сари интилаётганини яширмади ва жаҳон боксидаги энг кучли номлардан бири Наоя Иноуэ билан эҳтимолий жанг ҳақида фикр билдирди.
Халоковнинг айтишича, агар Иноуэ фаолиятини якунлаб юбормаса ва Муроджон Аҳмадалиев у билан реванш ўтказмаса, у ҳолда унинг ўзи япон юлдузига қарши рингга чиқишга тайёр. Ҳамюртимиз бу жангда мухлислар ким тезроқ эканини кўришини таъкидлади.
“Агар Иноуэ фаолиятини тугатиб юбормаса ва Муроджон Аҳмадалиев у билан бошқа жанг ўтказмаса, ўзим реванш оламан. Бу жангда ким тез эканини ўшанда кўриб олишади мухлислар. Ўйлашимча, мен ундан кўра тезроқ ва ғалабага ‘оч’ман”, — деди Абдумалик Халоков.
Эслатиб ўтамиз, Абдумалик кеча Тошкентда ташкил этилган профессионал бокс оқшомида ҳиндистонлик Вишал Кумарга қарши рингга кўтарилди. 6 раундга мўлжалланган баҳс узоқ давом этмади — Халоков рақибини иккинчи раундда нокаутга учратиб, навбатдаги ишончли ғалабасини қўлга киритди.
Бу натижа унинг профессионал рингдаги учинчи жангидаги учинчи ғалабаси бўлди. Халоков ҳаваскор боксдаги юқори даражасини проф боксда ҳам кўрсатишда давом этмоқда. Унинг тезлиги, аниқ зарбалари ва рақибни ўқиш қобилияти катта жанглар учун жиддий пойдевор бўла олади.
Қисқаси, Абдумалик Халоков оддий ғалабалар билан чекланиб қолмоқчи эмас. У Иноуэ каби жаҳон бокси юлдузларига қарши рингга чиқишни мақсад қилмоқда. 3 та жанг, 3 та ғалаба ва катта амбиция — Халоков проф рингда шунчаки иштирокчи эмас, овчи режимда.
“Zamin”ни Telegram'да ўқинг!
