Криштиано Роналдо майдондаги қизғин баҳслардан танаффус олиб, рафиқаси Георгина Родригуез ва фарзандлари билан Саудия Арабистонининг хушманзара соҳилларида дам олмоқда. Ал-Насср юлдузи ўзининг сўнгги жаҳон чемпионати бўлиши кутилаётган турнир олдидан Португалия терма жамоаси сафига қўшилишдан аввал куч тўпламоқда. Бу ҳақда Goal.com хабар беради.
41 ёшли афсонавий ҳужумчи ижтимоий тармоқларда ҳашаматли дам олиш жараёнидан суратлар улашди. Кристальдек тиниқ сувлар ва ҳовуз бўйидаги дам олиш лаҳзалари Роналдо оиласи учун футбол тақвимидаги кам сонли бўш вақтлардан бири бўлди. Георгина Родригуез ўзининг Instagram саҳифасида ҳужумчининг кенжа қизи Белла Эсмералда билан қўл ушлаб юргани ва фарзандларининг сувда ўйнаётган қувноқ лаҳзаларини намойиш этди.
Ҳатто таътил пайтида ҳам Криштиано Роналдо ўзининг машҳур ишчанлик қобилиятини унутгани йўқ. У ўғли Матеога қорин мушакларини чиқариш учун машқ бажаришни ўргатаётгани акс этган кадрлар мухлислар эътиборини тортди. Айнан мана шундай тиниmsиз меҳнат ва жисмоний ҳолатга бўлган эътибор унга бешинчи ўн йилликда ҳам юқори даражада тўп суриш имконини бермоқда.
Португалия терма жамоаси ЖЧ-2026 доирасидаги ўз юришини 17-июн куни Хюстонда Конгога қарши ўйин билан бошлайди. Бу турнир Роналдо учун фаолиятидаги олтинчи жаҳон чемпионати бўлади. Икки ўн йиллик давомида барча совринларни ютган ҳужумчи учун фақатгина ушбу нуфузли кубок етишмаяпти.
“Zamin”ни Telegram'да ўқинг!
