Жозе Моуринью иккинчи бор Реал Мадрид жамоасини бошқаришга тайёргарлик кўрар экан, таркибни тубдан ислоҳ қилиш режасини тузиб чиқди. Португалиялик мутахассис клубнинг икки йиллик совринсиз сериясига чек қўйиш учун тўртта асосий позицияни зудлик билан кучайтириш зарурлигини раҳбариятга маълум қилди. Унинг талабига кўра, марказий ҳимоячи, ўнг ва чап қанот ҳимоячилари ҳамда ярим ҳимоя чизиғига янги номлар олиб келиниши шарт. Бу ҳақда Goal.com хабар беради.
АС нашрининг хабар беришича, Моуринью учун биринчи даражали вазифа — ҳимоя чизиғини тўлиқ янгилашдир. 63 ёшли мураббий Антонио Рюдигер билан бирга ҳаракат қиладиган ва етакчилик қобилиятига эга бўлган камида битта ёки иккита юқори савияли марказий ҳимоячи сотиб олишни сўраган. Унинг фикрича, жамоанинг сўнгги муваффақиятсизликларига айнан мудофаадаги тартибсизлик сабаб бўлган.
Қанотларда ҳам жиддий ўзгаришлар кутилмоқда. Ўнг қанотда Трент Александер-Арнолд билан рақобатлашадиган янги футболчи қидирилаётган бўлса, чап қанотдаги трансфер Фран Гарсианинг келажагига боғлиқ бўлиб турибди. Моуринью ўзининг тактик тизими учун ҳозирги ҳимоя чизиғини ўта заиф деб ҳисобламоқда ва мустаҳкам пойдевор қуришни мақсад қилган.
Ярим ҳимоя чизиғи ҳам сезиларли даражада ўзгаради. Челси ва Интер собиқ мураббийи икки хил профилдаги ўйинчини талаб қилмоқда: ҳимоячиларни суғурталайдиган таянч ярим ҳимоячиси ҳамда рақиб мудофаасини ёриб ўта оладиган креатив плеймейкер. Бу қўшимчалар жамоанинг ҳам тўп билан, ҳам тўпсиз ўйинда устунлик қилишини таъминлаши керак.
Моуринью раҳбариятга фақатгина номи чиққан юлдузларни эмас, балки ғалаба учун борини берадиган, жамоа учун фидойиликка тайёр "оч" футболчиларни олиб келиш шартини қўйди. У Хаби Алонсо ва Альваро Арбелоа давридаги муаммоларни бартараф этиш учун кийиниш хонасида "жангчилар" муҳитини яратмоқчи.
“Zamin”ни Telegram'да ўқинг!
