Николай Валуев нега эрта боксдан кетиши сабабини ошкор қилди

Россиялик бокс бўйича ўта оғир вазнли собиқ жаҳон чемпиони Николай Валуев ўз даврида икки карра «WBA» чемпионлик камарига эгалик қилган. У 2018 йил августида 45 ёшни қаршилайди. Яқинда «Матч ТВ» телеканали мухбирига берган интервьюсида нима сабабдан катта боксни бу қадар эрта тарк этганини ошкор этди.

Унинг тан олиб айтишича, боксдан кетишга миясида пайдо бўлган саратон шиши мажбур қилган.

— Мен касаллик ҳақида эшитдим-у, ортиқ рингда қола олмаслигимни англадим. Негаки, касалликни йўқ қилиш учун учта жиддий жарроҳлик амалиётини бошдан кечиришим лозим эди. Менинг жуссам бунчалик йирик ва бошим катталиги ҳам аслида ўша саратон хасталиги натижаси деб биламан. Агар ўша жарроҳлик амалиётини бошламасак, охири ўлим билан тугаши ҳам мумкин эди. Башарти касал бўлмасам, асло катта боксдан кетмасдим…

Эслатиб ўтамиз, Николай Валуев катта боксдан кетгач, 2010 йили сиёсий арбобга айланди. 2011 йили эса «Единая Россия» партияси номидан Давлат Думаси депутати сифатида фаолият юрита бошлади. «Замин»ни Telegram’да ўқинг!