Андрей Фёдоров: "Истеъфо? Бу ҳақидаги гапларга ўрганиб қолганман"

Дербидаги мағлубиятдан кейин "Локомотив" бош мураббийи Андрей Фёдоров матбуот анжуманининг биринчи қисмида иштирок этди ва журналистлар саволларига жавоб қайтарди.
- Агарда ўйинни умумий тавсифлайдиган бўлсак, дастлабки 15 дақиқада "Бунёдкор" катта устунликка эга бўлди. Жамоам бугун яккакурашларда мағлуб бўлди ва шу сабабдан ўйинда ғалабага эриша олмади. Ўз ярим майдонимизда кўплаб қўпол хатоларга йўл қўйдик. Жуда оғир мағлубият бўлди. Тактика, паслар ёки бошқалар ҳақида гапириш қийин бўлмоқда. Ўйинни кучайтиришга қийналяпмиз. Кетма-кет олтинга тенг очколарни йўқотяпмиз. Бу эса мавсум якунида катта таъсир ўтказиши мумкин.

- Футболчиларда худди иштиёқ йўқдек кўринмоқда. "Локомотив"да молиявий муаммолар борми?
- Молиявий муаммолар йўқ. Кетма-кет учинчи ўйинда ҳам биз тезкор гол ўтказиб юборяпмиз ва шундан кейин ўйинда узилишлар пайдо бўляпти. "Локомотив" бир гол ўтказиб юбориб, таслим бўладиган жамоа эмас. Бу борада кўп ишлаймиз ва навбатдаги ўйинларда бундай бўлмаслиги учун ҳаракат қиламиз.

- "Локомотив" кетма-кет учинчи марта мағлуб бўлди. Ўйиндан олдин сизнинг истеъфоингиз ҳақида маълумотлар чиққанди. Бунга нима деб изоҳ бера оласиз?
- Бу борадаги гапларга ўрганиб қолганман. Ҳозирча менга бу ҳақида раҳбариятдан ҳеч қандай гаплар бўлгани йўқ.

- Жамоа ҳужумчилари Марат Бикмаев ва Абдул Азиз Юсупов ҳақида нима дея оласиз? Улар жароҳатидан қачон даволанишади?
- Кутяпмиз. Юсуповнинг жароҳати кутилганидан жиддийроқ бўлиб чиқди. Маратни эса кутяпмиз. Душанба куни у борадаги сўнгги маълумот бўлади. Ҳозирча у индивидуал тарзда машғулот ўтказяпти.

- Ойбек Қиличев 90 дақиқа ўйнашга тайёрми?
- Ҳозирча у 90 дақиқа ўйнашга тайёр эмас. У жамоамизга кечроқ келиб қўшилди. Таркибда кира олмаётганлар ҳозирда 80 фоизга ҳам тайёр эмас.

Манба: championat.asia “Замин” янгиликларини “Инстаграм”да кузатиб боринг