Apple ўзининг навбатдаги iPhone 18 смартфонларига янги A20 чипини жорий этиш орқали унда ишлаш самарадорлигини сезиларли оширишни режалаштирмоқда, деб хабар берди Pepelac.news. Янги процессор 2 нанометрли технологияда TSMC томонидан ишлаб чиқарилади.
Маълумотларга кўра, A20 чипи аввалги A19 чипига нисбатан 15%га тезроқ ишлайди, энергия истеъмоли эса ўзгармайди. 2-нм технология орқали Apple нафақат тезликни, балки энергия самарадорлигини ҳам яхшилашга эришади.
TSMC 2-нм чиплар ишлаб чиқариш бўйича буюртмаларни 1 апрелдан қабул қила бошлайди ва Apple биринчи мижозлардан бири бўлиши кутилмоқда. Илк маълумотларда A20 3-нм технологияда чиқарилиши айтилганди, аммо таҳлилчи Мин-Чи Куо ва Economic News Daily манбаси бу қарор ўзгарганини тасдиқламоқда.
Apple шунингдек, кремний-углерод батареяларини жорий этиш имкониятини ўрганмоқда — бу қурилма қалинлигини оширмасдан аккумулятор сиғимини ошириш имконини беради.
Бироқ 2-нм технологияга ўтиш бир кремний пластина учун ишлаб чиқариш нархини 30 000 долларгача ошириши мумкин. Бу эса iPhone 18 моделларининг бошланғич нархи ўсишига олиб келиши эҳтимолини кучайтиради. Шунга қарамасдан, A20 орқали юқори самарадорлик ва энергия тежамкорлик смартфонлар учун янги стандартларни белгилаши кутилмоқда.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
