Хитойда 2030 йилгача осмонда дрон-таксилар пайдо бўлади

Яқин беш йил ичида Хитой шаҳарлари ҳаво транспорт хизматларининг янги даврига қадам қўйиши мумкин. Авиация соҳасидаги инновация ва технологияларга ихтисослашган EHang стартапи 2030 йилга қадар Хитой осмонида “парвоз қилувчи йўналишли таксилар” фаол ҳаракатлана бошлашини билдирди. Бу ҳақда компания молиявий директори Конор Ян South China Morning Post нашрига берган интервьюсида маълум қилди.

Йўлда эмас, осмонда — янги давр

Компания вакилига кўра, катта шаҳарларда инфратузилма, жумладан учиш-қўниш майдончалари мавжуд бўлса, бундай хизматларни нафақат йўналишли, балки индивидуал тарзда ҳам жорий этиш мумкин. EHang буни нафақат эҳтимол сифатида, балки тўлиқ ишонч билан баён қилмоқда. Ян “2030 йилга қадар бундай дрон-таксиларнинг Хитойда кенг тарқалишига ишонаман”, деб таъкидлади.

EH216-S — сайёҳлар учун осмондаги саёҳат

EHang ўзининг EH216-S моделидаги электр учиш аппаратларини жорий йил охиригача сайёҳлик мақсадларида ишга туширишни режалаштирмоқда. Бу дронлар Гуанчжоу ва Хефей каби шаҳарларда диққатга сазовор жойлар устида сайр қилишга хизмат қилади. Бироқ, ҳозирча бу фақат аниқ белгиланган йўналишлар бўйича амалга оширилади.

EH216-S моделининг максимал парвоз масофаси 30 километрни, тезлиги эса соатига 130 км ни ташкил этади. Нархи 331 минг доллар этиб белгиланган ва у икки йўловчини олиб ўтиш имкониятига эга.

Таиланд ва экспорт бозорлари

EH216-S нафақат Хитойда, балки бошқа давлатларда ҳам қизиқиш уйғотмоқда. Хусусан, Таиландда синов парвозлари ўтган йилнинг ноябрида бошланган ва тез орада бу ерда ҳам хизматлар жорий этилиши мумкин. Шунингдек, Яқин Шарқ, Жануби-Шарқий Осиё ва Лотин Америкаси мамлакатларидан дронларга талаб юқори.

EHang рақобатдан чўчимаслигини билдирмоқда, чунки дронлар сегменти глобал миқёсда улкан салоҳиятга эга. Компания ўзини бозорда етакчилардан бири сифатида кўради ва бу позицияни ушлаб туриш ниятида.

Ҳамкорлик ва ривожланиш йўли

EHang ўзининг ишлаб чиқариш қувватини кенгайтириш устида ҳам ишламоқда. Жорий йил охиригача компания йилига 300 та ўрнига 1000 та учиш аппарати ишлаб чиқаришни мақсад қилган. Бу борада Gotion каби батарея ишлаб чиқарувчилари, Changan Automobile каби йирик автомобил компаниялари билан ҳамкорлик қилинмоқда.

Шунингдек, компания бир нечта янги батарея моделини яратиш устида иш олиб бормоқда. EHang АКШ фонд бозорида ҳам фаолият юритмоқда ва энди акцияларни бошқа биржага жойлаштиришни ҳам кўриб чиқмоқда.

Янги аппаратлар: VТ-35 ҳозирланмоқда

Компания EH216-S ортидан янги маҳсулот — VТ-35 учиш қурилмасини тақдим этади. У ўрта масофалар — тахминан 300 км гача бўлган йўналишлар учун мўлжалланган. Бу аппарат олдинги VТ-30 моделининг эволюцион давомчисидир ва электр энергиясини самарали сарфлаш ҳамда юқори крейсер тезлигини таъминлаш учун қайта ишланган.

Zamin.uz таҳририяти EHang лойиҳаси ортидан кузатувни давом эттиради. Сиз ушбу осмондаги такси хизматини синовдан ўтказишга тайёрмисиз?

Фото: South China Morning Post «Замин»ни Telegram’да ўқинг!