Сунъий интеллект туфайли Британияда иш ўринлари қисқармоқда

Сунъий интеллект технологияларининг жадал ривожланиши дунёдаги меҳнат бозорига салбий таъсир ўтказа бошлади. Хусусан, Буюк Британияда янги битирувчилар ва амалиётчи мутахассислар учун бўш иш ўринлари сезиларли даражада қисқарган. Бу ҳақда The Guardian нашри Adzuna платформаси маълумотларига таяниб хабар тарқатди.

Ҳисоботга кўра, ChatGPT каби сунъий интеллект воситалари кенг жорий этилганидан сўнг, маҳаллий иш бозорида эндигина фаолият бошлаётганлар учун иш имкониятлари 31,9 фоизга камайган. Бу рақам ёш мутахассислар учун ёмон хабардир. Чунки аксарият компаниялар самарадорликни ошириш ва харажатларни қисқартириш мақсадида инсон ресурсларини AI технологиялари билан алмаштиришни маъқул кўрмоқда.

Айниқса, дастурлаш, матн таҳрирлаш, ёзиш ва таҳлил қилиш соҳаларида роботлашган тизимлар катта тезлик билан ишлаб чиқилмоқда. Бу жараён меҳнат бозорида рақобатни кучайтириб, айниқса, тажрибасиз ёшлар учун иш топишни анча мураккаблаштириб қўйди.

Қўшимча қилинишича, бу жараён Европа миқёсида ҳам сезилаётган бўлиб, йирик компаниялар ходимлар сонини камайтиришга ўта бошлаган. Масалан, British Telecommunications ширкати 2023 йилда ўз ходимларининг қарийб 40–50 минг нафари билан хайрлашиш ниятида эканини маълум қилган. Бу каби рақамлар сунъий интеллект нафақат технология тараққиёти, балки ижтимоий муаммолар сабабчисига ҳам айланаётганини кўрсатади.

Кўплаб мутахассислар бу тенденциянинг давом этиши ёшлар учун ишсизлик даражасини ошириши, таълим тизими эса замонавий талабларга мослашиши зарурлигини таъкидлашмоқда. Энди муваффақиятли иш топиш учун нафақат диплом, балки сунъий интеллект билан ҳамкорликда ишлай олиш қобилияти муҳим аҳамият касб этади.

Ҳозирда кўплаб университетлар талабаларга AI воситаларидан оқилона фойдаланишни ўргатишга киришган. Бу эса бозордаги мавқеини йўқотмаслик учун муҳим қадамлардан бири бўлиб қолмоқда.

Мухлислар ва ўқувчилар эса шу савол билан қолишмоқда: инсон меҳнати ўрнини технология тўлиқ босиб кетадими? Ёки одам ва машина ўртасидаги ҳамкорлик мувозанати сақланиб қоладими? Вақт бу саволларга аниқ жавоб беради. «Замин»ни Telegram’да ўқинг!