Технология гиганти Cisco компанияси молиявий чоракдаги даромадлари кутилганидан юқори бўлишига қарамай, ўз ходимларининг тахминан 5 фоизини ёки 4 мингга яқин кишини ишдан бўшатишини эълон қилди. Тармоқ ускуналари ишлаб чиқарувчиси ушбу қадамни харажатлар таркибини оптималлаштириш ҳамда сунъий интеллект ва киберхавфсизлик соҳаларига сармоя киритиш зарурати билан изоҳлади. Бу ҳақда Techcrunch.com хабар беради.
Cisco'нинг бу қарори сўнгги пайтларда технология компаниялари орасида кузатилаётган тенденцияга мос келади. Аввалроқ Cloudflare ва General Motors каби йирик компаниялар ҳам кучли молиявий кўрсаткичларга қарамай, ходимлар сонини қисқартирган эди. Cisco киберхавфсизликка инвестицияларни оширишни режалаштирмоқда, чунки компания роутер ва фаерволларидаги заифликлар туфайли юзага келган хавфсизлик муаммолари билан курашмоқда.
Компания бош директори Чак Роббинс ўз блогида Cisco'нинг рекорд даражадаги даромадлари ва икки хонали ўсиш суръатлари ҳақида фахр билан ёзди. Шу билан бирга, у компания ичида сунъий интеллектдан фойдаланиш бўйича стратегик инвестициялар давом этишини таъкидлади. Бироқ, Роббинснинг 2025-йил учун 52 миллион доллардан ортиқ компенсация олиши режалаштирилгани жамоатчиликда саволлар уйғотмоқда.
Cisco учун бу сўнгги йиллардаги илк қисқартириш эмас. Компания 2024-йилда икки марта минглаб ходимларни ишдан бўшатган, 2025-йилда эса яна 150 та иш ўрни қисқартирилган эди. Ҳозирча компания вакиллари бош директорнинг маоши камайтирилиши мумкинлиги ҳақидаги саволларга жавоб бермади.
“Zamin”ни Telegram'да ўқинг!
