Mobiuz Қорақалпоғистон ва Хоразмда мобил интернет тезлиги бўйича етакчига айланди

Мобил алоқа оператори Mobiuz, Қорақалпоғистон Республикаси ва Хоразм вилоятининг аҳолиси зич яшайдиган ҳудудларида интернет тезлиги бўйича барча рақобатчиларини ортда қолдирди, деб “Ўзбекистон Телекоммуникация тармоқларини бошқариш Республика маркази” хабар берди.

Ушбу маълумотлар 2025-йил 5-августдан 24-августга қадар ўтказилган мустақил радиомониторинг натижаларига асосланади. Текширувлар Ўзбекистоннинг ғарбий ҳудудларидаги шаҳар ва туманларда 4000 км дан ортиқ масофада амалга оширилган.

Мониторинг натижаларига кўра, Mobiuz маълумотлар узатиш тезлиги ва тармоқ барқарорлиги бўйича энг юқори кўрсаткичларни қайд этди.

Қорақалпоғистонда ўртача мобил интернет тезлиги 59,99 Мбит/сония, Хоразм вилоятида эса 36,79 Мбит/сонияни ташкил этди. Бу рақамлар операторнинг техник имкониятлари ва инфратузилма сифати юқорилигини кўрсатади.

Таҳлилларга кўра, Mobiuz интернет тезлиги нафақат юклаб олиш тезлиги, балки сигнал барқарорлиги ва узатиш сифати бўйича ҳам етакчилик қилмоқда.

Мустақил радиомониторинг натижалари ушбу операторнинг соҳага оид ишончли ва устун ўрнини яна бир бор тасдиқлади.