Қозоғистон ҳарбий тизимида илк марта сунъий интеллект асосида ишлайдиган виртуал психолог – AI-sulu тақдим этилди, деб @sputnikKZ хабар берди. Ушбу инновацион ташаббус армия сафидаги аскарларнинг руҳий барқарорлигини таъминлаш, уларга доимий психологик ёрдам кўрсатишни мақсад қилади.
AI-sulu номли Telegram-бот куннинг исталган вақтида – 24 соат мобайнида ишлайди. У қийин руҳий ҳолатга тушган ҳарбийларга дарров жавоб беради, дардини тинглайди, қўллаб-қувватлайди ва аста-секин руҳий тикланишга ёрдамлашади. Мутахассислар фикрига кўра, у тўлиқ психолог вазифасини бажара олмаслиги мумкин, бироқ дастлабки ёрдам нуқтаси сифатида жуда фойдали бўлиши мумкин.
Бот асосан икки тилда – қозоқ ва рус тилларида ишлайди. Унинг имкониятлари орасида ҳис-туйғуларни тушуниш, маслаҳат бериш, хавотир ва стрессли ҳолатларда оддий машқлар тавсия этиш ҳам бор. Шунингдек, бот зарурат туғилганда инсон психологига мурожаат қилишни ҳам тавсия этади ва қайси ташкилотлардан ёрдам олиш мумкинлигини маълум қилади.
Лойиҳанинг ишлаб чиқарувчиларига кўра, AI-sulu ёлғизлик ва тушкунликдан азият чекувчи аскарларга ёрқин нуқта сифатида хизмат қилиши мумкин. Қозоғистон мудофаа соҳасида бу каби илғор ечимларни жорий этиш орқали ҳарбий хизматчиларнинг умумий психологик муҳитини яхшилашни режалаштирмоқда.
“Zamin”ни Telegram'да ўқинг!
