Инсайд маълумотларга кўра, Apple ўзининг илк букланадиган смартфони — iPhone Fold’да Face ID тизимидан воз кечиши мумкин. Компания унинг ўрнига аввал кенг қўлланган, аммо кейинчалик сояга кетган Touch ID’ни қайта жорий этишни режалаштирмоқда. Бармоқ изи орқали аутентификация қилиш тизими эса қурилманинг ён томонида жойлашган Power тугмасига ўрнатилади.
Маълумки, Touch ID сўнгги марта 2022 йилда тақдим этилган iPhone SE моделида қўлланилган эди. Apple’нинг асосий флагман смартфонларида эса бу технология 2017 йилдан бери умуман ишлатилмаган. Энди эса ушбу классик, бир вақтлар жуда машҳур бўлган функция компаниянинг энг қиммат ва энг кўп муҳокама қилинаётган iPhone’ида яна саҳнага қайтиши мумкин.
Бу қарорнинг асосий сабаби қурилманинг конструкцияси ва ички дизайни билан боғлиқ. Face ID тизими, шунингдек экран остига ўрнатилган сканерлар смартфон ичида анча жой талаб қилади. Букланадиган iPhone эса Apple учун ташқи кўринишда ҳам, техник жиҳатдан ҳам рақобатчилардан қолишмаслиги керак — айниқса қалинлик масаласида.
Бундан ташқари, букланадиган формат Face ID учун яна бир мураккаблик туғдиради. Қурилмани ҳам очиқ, ҳам ёпиқ ҳолатда қулфдан чиқариш учун икки хил Face ID тизимини жойлаштириш талаб этилади. Бу эса муҳандислик нуқтаи назаридан ҳам, нарх ва жой масаласида ҳам қўшимча муаммоларни келтириб чиқаради.
Шу фонга қараганда, Touch ID’ни ён томонга ўрнатиш Apple учун энг оқилона ечим сифатида кўрилмоқда. Бу усул техник жиҳатдан соддароқ, жойни кам эгаллайди ва энг муҳими — ишончли.
Touch ID’нинг қайта жорий этилиши Apple мухлисларининг бир қисми учун айни муддао бўлиши мумкин. Кўплаб фойдаланувчилар бармоқ изи орқали қулфдан чиқаришни тезроқ, қулайроқ ва айрим ҳолатларда Face ID’дан ҳам ишончли деб ҳисоблайди. Айниқса, ниқобда ёки ёруғлик паст бўлган шароитларда бу усул янада афзал кўринади.
Қисқаси, Apple технологияда олдинга интилаётган бўлса-да, айрим ҳолларда синалган ва ишончли ечимларга қайтишдан ҳам қўрқмаяпти. iPhone Fold эса нафақат дизайни, балки айнан шу каби кутилмаган қарорлари билан ҳам бозорда катта қизиқиш уйғотиши аниқ.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
