"Tesla" компанияси Илон Маскка 2018 йилда ваъда қилинган рекорд даражадаги компенсация пакетини расмийлаштириш учун АҚШ қимматли қоғозлар комиссиясига ҳужжат топширди. Гап ўша пайтда 56 млрд долларга баҳоланган 304 миллион дона акция ҳақида бормоқда. Бу ҳақда Ixbt.com хабар беради.
Компания акциялари нархи 376 долларгача кўтарилиши натижасида ушбу пакетнинг жорий қиймати 114 млрд доллардан ошиб кетди. Бу бир неча йил давом этган суд жараёнларига якун ясаши кутилмоқда.
2018 йилда директорлар кенгаши Маскка мураккаб шарт қўйган эди: у фақат компания капиталлашуви ва бизнес кўрсаткичлари бўйича 12 та мақсадга эришса, акцияларга эга бўларди. Маск 2021 йил охирига келиб барча вазифаларни бажарган.
Делавер штати олий суди Маскка олти йиллик иш ҳақи тўланиши адолатли экани ҳақида қарор чиқарди. Шартга кўра, Маск компанияда камида 2028 йилгача қолиши керак ва олинган акцияларни беш йил давомида сотиш ҳуқуқига эга эмас.
Ҳозирда Илон Маск 839 млрд доллар бойлик билан дунёнинг энг бадавлат кишилари рейтингида етакчилик қилмоқда. Акциядорлар аллақачон унинг учун 1 триллион долларгача етиши мумкин бўлган янги компенсация пакетини ҳам маъқуллаган.
“Zamin”ни Telegram'да ўқинг!
