"Роллс-Ройcе" ва "easyJet" компаниялари юз фоиз водородда ишлайдиган модификация қилинган "Пеарл 15" двигателининг ер усти синовларини муваффақиятли якунлади. Двигатель тўлиқ парвоз қувватида ишлади. Бу ҳақда Ixbt.com хабар беради.
Синовлар АҚШдаги NASA полигонида бўлиб ўтди.
Компаниялар маълумотига кўра, двигатель тўлиқ парвоз циклини симуляция қилди. Бунга ишга тушириш, ҳавога кўтарилиш, крейсер режими ва қўниш жараёнлари киритилди.
Замонавий реактив двигатель реал шароитларга максимал даражада яқинлаштирилган ҳолда газсимон водородда текширилди.
Ушбу натижа "easyJet" ва "Роллс-Ройcе" ўртасидаги кўп йиллик ҳамкорликнинг давоми бўлди. Аввалроқ компаниялар Буюк Британияда "AE2100" двигателини яшил водородда, Германияда эса "Пеарл" ёниш камерасини синовдан ўтказган эди.
"Роллс-Ройcе" вакиллари дастур водороднинг замонавий авиация газ турбиналарида ўзини қандай тутишини тушунишга ёрдам берганини таъкидлади. Шунингдек, ёниш, ёқилғи етказиб бериш, бошқарув тизимлари ва авария сценарийлари текширилди.
Бироқ, бу водородли йўловчи самолётлари тез орада тижорат мақсадларида ишлатилишини англатмайди. Саноат олдида ёқилғини сақлаш, аэропорт инфратузилмаси, сертификатлаш ва самолёт конструкциясини мослаштириш каби жиддий вазифалар турибди.
“Zamin”ни Telegram'да ўқинг!
