Мобиле Информ Гроуп компанияси "Ред OS М" операцион тизимида ишлайдиган MIG A65 смартфонининг чакана савдоси бошланганини эълон қилди. Бу ҳақда Ixbt.com хабар беради.
Илгари фақат корпоратив мижозлар учун мўлжалланган ушбу қурилма эндиликда йирик маркетплейслар ва чакана савдо тармоқларида оммага тақдим этилмоқда.
MIG A65 мураккаб шароитларда ишлашга мослаштирилган ҳимояланган смартфон ҳисобланади. У сув ва чангдан ҳимояланган бўлиб, 1,5 метр баландликдан тушишга бардош беради ҳамда -20 дан +60 даражагача бўлган ҳароратда ишлай олади.
Қурилма 6,56 дюймли HD экран, 48 мегапикселли асосий ва 32 мегапикселли олд камера билан жиҳозланган. Смартфон MediaTek Helio G99 процессори, 8 GB тезкор ва 256 GB гача ички хотира ҳамда 5800 mA/соат сиғимли аккумуляторга эга.
"Ред OS М" тизими Google хизматларисиз ишлайди ва иловалар RuStore онлайн дўкони орқали ўрнатилади. Шунингдек, смартфонда тезкор кириш учун иккита дастурлаштириладиган тугма мавжуд.
“Zamin”ни Telegram'да ўқинг!
