Huawei компанияси HarmonyOS 6 операцион тизими 60 миллиондан ортиқ қурилмага ўрнатилганини расман маълум қилди. Аввалроқ саноат таҳлилчилари томонидан тахмин қилинган ушбу кўрсаткич эндиликда компания томонидан тасдиқланди. Бу ҳақда Ixbt.com хабар беради.
Huawei вакилларининг таъкидлашича, экотизимнинг ўсиш суръатлари сезиларли даражада тезлашган. Хусусан, HarmonyOS 5 ва 6 версиялари ҳар ойда жами 7,5 миллиондан ортиқ янги қурилмаларда фаоллаштирилмоқда. Компаниянинг ички режаларига кўра, йил охирига қадар ушбу платформадаги қурилмалар сони 100 миллионга етиши кутилмоқда, бу эса Huawei'нинг мобил операцион тизимлар бозоридаги мавқеини янада мустаҳкамлайди.
Шу билан бирга, компания HarmonyOS 6.1 янгиланишини тарқатишни бошлади. Мазкур янгиланиш галерея билан ишлаш учун янги воситалар, букланувчи қурилмалар учун махсус планшет режими ҳамда ўйин ёрдамчиси каби функцияларни ўз ичига олади.
Келгусида Huawei HarmonyOS 7.0 версиясини тақдим этишни режалаштирмоқда. Унда сунъий интеллект имкониятларининг янада чуқурроқ интеграцияси ҳамда қайта ишланган фойдаланувчи интерфейси кутиляпти.
“Zamin”ни Telegram'да ўқинг!
