Microsoft компанияси Windows 11 тизимида кўпчилик фойдаланувчилар узоқ вақтдан буён кутган функцияни қайтарди. Янги бета-версияларда вазифалар панелини (таскбар) экраннинг исталган томонига — юқорига, пастга, чапга ёки ўнгга кўчириш имконияти пайдо бўлди. Windows 10 тизимида одатий ҳол бўлган бу функция Windows 11 чиққанидан бери чекланган эди. Бу ҳақда Ixbt.com хабар беради.
Янги янгиланиш нафақат панелни жойлаштириш, балки ихчам режимни ҳам тақдим этади. Эндиликда панел баландлигини камайтириш ва белгиларни кичрайтириш мумкин, бу эса айниқса ноутбуклар ва кичик экранли қурилмаларда иш жойини тежашга ёрдам беради. Microsoft интерфейсни янги жойлашувга мослаштириб, «Старт» менюси ва қидирув тизимини ҳам панел жойлашувига қараб ўзгарадиган қилди.
Шунингдек, компания кўп ойнали режимда ишловчилар учун «Невер комбине» функциясини такомиллаштирди. Эндиликда вертикал панелда вазифалар ва ойналар номлари алоҳида кўрсатилади, бу эса бир вақтнинг ўзида бир нечта дастур билан ишлашни анча қулайлаштиради.
Ҳозирча ушбу ўзгаришлар фақат Windows Инсидер дастури иштирокчилари учун очиқ. Microsoft ушбу қадамлар билан Windows 11 тизимини дастлабки чекланган интерфейсдан воз кечиб, фойдаланувчилар учун қулайроқ ва мослашувчан муҳитга айлантиришни мақсад қилган.
“Zamin”ни Telegram'да ўқинг!
