Galaxy Watch 10 ақлли соатлари Микро ЛЕД экранлар билан жиҳозланиши мумкин

Samsung компаниясининг Galaxy Watch ақлли соатларида Микро ЛЕД экранлар пайдо бўлиши кутилмоқда. Ушбу технологияни жорий этиш режалари ҳақида бир неча йил аввал гапирилган эди, бироқ эндиликда лойиҳа эксперимент босқичидан реал ишлаб чиқаришга тайёргарлик босқичига ўтаётгани ҳақида маълумотлар пайдо бўлди. Бу ҳақда Ixbt.com хабар беради.

Кореянинг ЭТНевс нашри хабарига кўра, Samsung Дисплай бўлинмаси Асан шаҳрида Микро ЛЕД панелларини ишлаб чиқариш учун янги линия қурмоқда. Ускуналарни ўрнатиш ишлари жорий йилда бошланиши кўзда тутилган. Дастлабки босқичда компания синов тариқасида маҳсулот чиқариб, техник натижаларни ҳамда Galaxy Watch линияси учун масъул бўлган Samsung мобил бўлинмаси томонидан билдириладиган талабни баҳолайди.

Агар синовлар муваффақиятли якунланса, бундай дисплейларни оммавий ишлаб чиқариш 2027-йилнинг иккинчи ярмида старт олиши мумкин. Бу эса келажакдаги Galaxy Watch авлодларида, хусусан, Galaxy Watch 10 сериясидан бошлаб янги турдаги экранларни кўриш имконини беради.

Микро ЛЕД технологияси дисплей саноатидаги энг истиқболли йўналишлардан бири ҳисобланади. Бундай экранлар ҳозирги ақлли соатларда қўлланиладиган ОЛЕД панелларга қараганда юқори ёрқинлик, яхшиланган контраст, кам энергия сарфи ва узоқроқ хизмат қилиш муддатини таъминлайди.

Эътиборлиси шундаки, Samsung тақиладиган электроника учун Микро ЛЕД ишлаб чиқаришни йўлга қўйган биринчи компаниялардан бири бўлиши мумкин. Аввалроқ Apple ҳам ушбу технологияни Apple Watch соатларида қўллашни режалаштирган эди, бироқ техник ва ишлаб чиқаришдаги қийинчиликлар сабабли лойиҳадан воз кечишга мажбур бўлган.