Chevrolet Tracker va Onix joriy yilda Spark va Nexia oʻrnini egallaydi

Jahon avtomobilsozlik sanoatiga yarimoʻtkazgichlar va logistika bilan bogʻliq global inqirozlar, shuningdek, Sharqiy Evropada kuzatilayotgan geosiyosiy muammolar oʻz ta'sirini oʻtkazdi, bu ham ishlab chiqarish hajmiga, ham avtomobil narxi va uni kutish muddatlariga sezilarli ta'sir koʻrsatdi.

JD Power va LMC Automotive avtomobilsozlik sanoati tahlilchilarining hisobotiga koʻra, AQShda iyun oyida avtomobillarning oʻrtacha narxi rekord darajada 45 844 dollarni tashkil etdi, bu oʻtgan yilga nisbatan 14,5 foizga koʻpdir.

Narxlarning koʻtarilishi Rossiyaning bozoriga ham oʻz ta'sirini koʻrsatdi – 2022 yilda kompaniya avtomobillar narxini oʻrtacha 30-40 foizga oshirdi.

Global kataklizm oqibatida avtomobil ishlab chiqarish hajmining kamayishi yuzaga keldi: Buyuk Britaniyada mikrochiplarning etishmasligi tufayli avtomobil ishlab chiqarish 41 foizga kamaydi va jahon avtomobilsanoati lideri Honda Motor ta'minot zanjiri va logistika bilan bogʻliq doimiy muammolar tufayli Yaponiyada 2022 yilda rejalashtirilgan ishlab chiqarishni 30 foizga qisqartirishini ma'lum qildi.

Xuddi shu tendentsiya Evropa Ittifoqi mamlakatlarida ham kuzatilmoqda. Evropa avtomobil ishlab chiqaruvchilar Assotsiatsiyasining hisobotiga koʻra, Evropa Ittifoqida yangi engil avtomobillarni roʻyxatdan oʻtkazish pasayishda davom etmoqda.

Yillik hisob-kitoblarga koʻra, mavsumiy oʻzgarishlarni hisobga olgan holda, AQShda yangi avtomobillarning umumiy savdosi iyun oyida 13,1 million donani tashkil etdi, bu oʻtgan yilga nisbatan 2,3 million donaga kam.

Bu yil global avtomobil savdosi 81.4 million dona bilan oldingi holatini saqlab qolishi kutilmoqda. Chunki Xitoydagi mikrochip tanqisligi va kuzatilgan karantin savdo hajmiga oʻz ta'sirini oʻtkazdi.

Avtomobillarni kutish muddatiga e'tibor qaratsak, Honda Motor va Kia joriy yilning mart oyida Janubiy Koreyadagi mijozlarga toʻlangan, ammo etkazib berilmagan avtomobillar soni jami 1 milliondan oshib ketib, ularning kutish muddati 18 oygacha etdi. Xuddi shu davrda Toyota Tundra’ning ba'zi versiyalarini AQShga etkazib berishni va'da qilmoqda. Yaponiya bozorida Toyota Land Cruiser 300 avtomobilining kutish muddati hali ham 4 yil.

UzAuto Motors AJ joriy yilning birinchi 6 oyligida 160 ming dona avtomobil ishlab chiqardi. Shuningdek iste'molchilarning talablarini inobatga olib, yangi avtomobil modellarini ishlab chiqarishni yoʻlga qoʻydi. Iste'molchilarning zamonaviy avtomobilga boʻlgan talabining ortib borayotganligi sababli, UzAuto Motors ishlab chiqarish liniyalarini bosqichma-bosqich yangi avtomobil modellariga oʻtkazmoqda.

Detroytda General Motors kompaniyasi vakillari bilan modellar qatorini yangilash va ishlab chiqarish hajmini oshirish doirasida oʻtkazilgan muzokaralarda, UzAuto Motors zavodi ishlab chiqarish quvvatini sezilarli darajada oshirish boʻyicha kelishuvga erishildi. Shuningdek, Chevrolet Tracker va Onix bilan bir qatorda Chevrolet avtomobillarining zamonaviy modellari bilan kengaytirish va ishlab chiqarilayotganlarini yangilash (facelift) boʻyicha ishlar olib borilmoqda.

Aytib oʻtadigan boʻlsak, joriy yilning iyul oyida Chevrolet Tracker avtomobili ishlab chiqarilishini yoʻlga qoʻydi. Oradan bir hafta oʻtgach, PPV bosqichida birinchi Chevrolet Onix avtomobilini ishlab chiqardi. 2023 yil boshida Chevrolet Onix avtomobilini ishlab chiqarish rejalashtirilgan.

Konveyerlarning yangi avtomobil modellarini ishlab chiqarishga oʻtkazilishi munosabati bilan, 2022 yil yakunida Chevrolet Spark va Nexia avtomobillarini ishlab chiqarish toʻxtatiladi. Qolgan butlovchi qismlar yil davomida ushbu avtomobil modellarining turli konfiguratsiyalardagi soʻnggi partiyalarini cheklangan miqdorda ishlab chiqarishni davom ettirish imkonini beradi. Bugundan boshlab, ushbu Chevrolet Spark va Nexia avtomobillari sotuvga chiqariladi.

Shuningdek, Oʻzbekistonda UzAuto Motors avtomobillariga boʻlgan talabning yuqori ekanligini inobatga olib, kompaniya Chevrolet Spark va Nexia avtomobillari eksport hajmining bir qismini ichki bozorga yoʻnaltirishga qaror qildi.

Chetga eksportga joʻnatiladigan komplektatsiyalar bir qator qoʻshimcha optsiyalarni oʻz ichiga oladi, jumladan: Evro 5 katalizatorli dvigatel, ERA-GLONASS tizimi, ikkita rangga ega boʻlgan korpus va boshqalar. Sotuvga chiqariladigan avtomobillar komplektatsiyasiga qarab, kuchaytirilgan dvigatel, karter himoyasi, char qoplamali rul, qoraytirilgan orqa oyna, qoʻshimcha dinamiklar, yon xavfsizlik yostiqchalari va mexanik uzatmalar qutisi bilan jihozlanadi. “Zamin” yangiliklarini “Telegram”da kuzatib boring