My.gov.uz orqali gaz ballon o‘rnatish ruxsatnomasi endi osonlashdi

My.gov.uz elektron platformasi orqali avtomashinaga gaz ballon o‘rnatish uchun ruxsat olish tartibi ancha yengillashtirildi.

Endilikda fuqarolardan faqatgina onlayn arizani to‘ldirib, uni Yo‘l harakati xavfsizligi xizmatiga (YHXX) yuborish talab etiladi. Qolgan jarayonlarni esa YHXX mas’ul xodimlari o‘zlari bajaradi.

Ariza ko‘rib chiqilgandan so‘ng, natija foydalanuvchining shaxsiy kabineti orqali taqdim etiladi.

Ushbu xizmatning narxi 123 600 so‘m (0,3 BHM) etib belgilangan. Qayd etilishicha, xizmat ko‘rsatish muddati 10 ish kunidan oshmaydi.

Muttaxassislar ta’kidlashicha, jarayonning raqamlashtirilishi orqali fuqarolar uchun vaqt tejaladi, ortiqcha qog‘ozbozlik va navbatlarda turishning oldi olinadi. Bu esa davlat xizmatlari samaradorligini yanada oshirishga xizmat qiladi.