O‘zbekistonda pullik avtomobil yo‘llaridan foydalanish uchun to‘lov narxlari haqida dastlabki ma’lumotlar ma’lum qilindi, deb xabar berdi rasmiy manbalar. Bu loyiha mamlakat transport tizimini zamonaviylashtirish, haydovchilarga qulaylik yaratish va tirbandliklarni kamaytirishni ko‘zlaydi.
Oliy Majlis Qonunchilik palatasida bo‘lib o‘tgan yig‘ilishda Transport vazirligi huzuridagi Avtomobil yo‘llari qo‘mitasi vakillari tomonidan pullik yo‘llar haqidagi hisob-kitoblar taqdim etildi. Qo‘mita bosh yuridik maslahatchisi Hasan Umarov ma’lumot berishicha, hozircha olib borilgan tahlillarga ko‘ra, 200 kilometr masofani pullik yo‘l orqali bosib o‘tish narxi taxminan 100 ming so‘m atrofida bo‘lishi kutilmoqda.
Uning so‘zlariga ko‘ra, bu summa odatiy yo‘llarda tezlikni buzgan haydovchilarga qo‘llanadigan jarimaning yarmiga teng. Shuning uchun ham pullik yo‘llar nafaqat qulaylik, balki vaqt va xavfsizlik jihatidan ham afzallik beradi.
“Pullik yo‘llar fuqarolar uchun qulay harakatlanishni ta’minlaydi. Ular orqali haydovchilar vaqtini tejaydi, xavfsiz va barqaror harakatlanish imkoniga ega bo‘ladi. Shu bilan birga, bepul yo‘llardagi tirbandliklar ham kamayadi, transport oqimi izchil bo‘ladi”, — dedi Hasan Umarov.
Shuningdek, kelgusida pullik yo‘llarning tariflari xususiy investorlar ishtirokida shakllantirilishi rejalashtirilmoqda. Tasdiqlangan metodologiya asosida ularga to‘lov miqdorini mustaqil belgilash huquqi beriladi. Bu tizim tabaqalashtirilgan bo‘ladi — ya’ni to‘lov yo‘l uzunligi yoki har bir kilometr uchun alohida hisoblanishi mumkin.
Mutaxassislar fikricha, pullik yo‘llar tizimi mamlakatdagi yo‘l infratuzilmasini rivojlantirish, transport oqimini muvozanatlashtirish va iqtisodiy samaradorlikni oshirishga xizmat qiladi. Bunday yo‘llar orqali yo‘lovchi va yuk tashish vaqti qisqaradi, avtomobillar sarfi kamayadi va yo‘l xavfsizligi oshadi.
Yangi tizim to‘liq ishga tushgach, haydovchilar tanlov imkoniyatiga ega bo‘ladi: tez va qulay pullik yo‘l yoki odatiy marshrut orqali harakatlanish. Transport sohasi vakillarining ta’kidlashicha, bu qadam mamlakatda zamonaviy logistika tizimini shakllantirishda muhim bosqich bo‘ladi.
“Zamin”ni Telegramʻda oʻqing!
