UzAuto Motors 3-noyabr kuni e’lon qilgan 100 ming dona Cobalt sotuvi atrofidagi vaziyat kuzatuvchilarni befarq qoldirmadi. Kompaniya belgilangan 7 kunlik to‘lov muddati yakuniga yetgach, shartnomalarning katta qismi amalsiz holatga tushdi. Rasmiy ma’lumotlarga ko‘ra, umumiy shartnomalardan bor-yo‘g‘i 20 ming 833 tasi to‘lov bilan tasdiqlangan.
Shundan keyin UzAuto Motors’ga mijozlar tomonidan ko‘plab murojaatlar yo‘llana boshladi. Aniqlanishicha, 3-noyabr kuni tuzilgan shartnomalarning bir qismi haqiqiy ehtiyojsiz, «omadini sinab ko‘rish» maqsadida rasmiylashtirilgan ekan. Shu omillar kompaniyani yangi qaror qabul qilishga majbur qildi.
Shu bois UzAuto Motors to‘lov muddati o‘tgach, Cobalt modellarini rasmiy dilerlar salonlarida ochiq sotuvga chiqarishni yo‘lga qo‘ydi. Bu esa onlayn tizim orqali xarid qila olmagan, ammo haqiqiy ehtiyojga ega bo‘lgan mijozlar uchun qo‘shimcha imkoniyat yaratdi.
Endilikda xaridor o‘zining istagan Chevrolet dilerlik markaziga borib, o‘sha yerdagi mavjud avtomobillardan o‘z tanlovini amalga oshiradi. Shuningdek, u qo‘shimcha jihozlarni diler markazida — avtomobil kafolatiga zarar yetkazmagan holda — o‘rnatish imkoniyatiga ham ega bo‘ladi. Barcha shartnomalar yagona elektron tizimda rasmiylashtirilib, har bir hujjatda uning haqiqiyligini tasdiqlovchi QR-kod joylashadi.
Rasmiy ma’lumotlarga ko‘ra, 20-noyabr holatiga dilerlik tarmoqlariga 2624 dona Cobalt yetkazilgan, shularning 1969 tasi sotilib, egalariga topshirilgan. Yana taxminan 6000 dona avtomobil markazlarga yo‘l olgan. Kompaniya ta’kidlashicha, dilerlardagi ochiq savdo onlayn orqali xarid qilingan avtomobillarni o‘z vaqtida topshirish jarayoniga mutlaqo ta’sir qilmaydi.
Yangicha savdo tartibi bir qarashda bozordagi talabni haqiqiy ko‘rinishda baholashga va real xaridorlarga qulaylik berishga qaratilgani bilan ahamiyatli. Endi Cobalt olishni rejalashtirgan mijozlar uchun imkoniyat kengaydi — asosiysi, dilerlik markaziga borib, real mavjud mashinalardan tanlash mumkin.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
