Tesla 1,1 soniyada tezlashuvchi Roadster modelini taqdim etadi
Tesla rahbari Ilon Mask yangi avlod Roadster modeli kompaniyaning rul bilan boshqariladigan oxirgi avtomobili bo‘lishini ma’lum qildi. SpaceX raketa texnologiyalari bilan jihozlanadigan ushbu elektromobil 1,1 soniyada 100 km/soat tezlikka erishishi va hatto havoda muallaq turishi kutilmoqda. Loyiha taqdimoti yaqin oylarda o‘tkazilishi rejalashtirilgan bo‘lsa-da, uning ommaviy ishlab chiqarilishi 2027-2028-yillardan oldin boshlanmaydi. Narxi 200 ming dollardan boshlanadigan ushbu model Tesla tarixidagi eng murakkab va uzoq kutilgan loyiha bo‘lib qolmoqda.
«Tesla» kompaniyasi rahbari Ilon Mask yangi avlod «Roadster» modeli haqida kutilmagan ma'lumotlarni o'rtoqlashdi. 2026 yil 22 aprel kuni bo'lib o'tgan choraklik hisobot anjumanida Mask ushbu elektromobil kompaniyaning qo'lda boshqariladigan, ya'ni rulli oxirgi avtomobili bo'lishini ta'kidladi. Kelajakda ishlab chiqariladigan barcha modellar to'liq avtonom boshqaruvga o'tishi rejalashtirilgan. Bu haqda Ixbt.com xabar beradi.
Yangi «Roadster» texnik jihatdan hayratlanarli ko'rsatkichlarga ega bo'lishi kutilmoqda. «SpaceX» raketa texnologiyalari bilan jihozlanadigan ushbu mashina atigi 1,1 soniya ichida 100 km/soat tezlikka chiqa oladi. Mask avvalroq bergan intervyularida hatto avtomobilni havoda muallaq turishga majbur qilish niyati borligini ham aytib o'tgan edi. Hozirda muhandislar xavfsizlik choralarini ko'rish ustida ishlamoqda.
Loyiha uzoq vaqtdan beri kechikayotganiga qaramay, uning taqdimoti yaqin bir oy ichida o'tkazilishi mumkin. Avtomobilning boshlang'ich narxi 200 000 dollar etib belgilangan, maxsus «Founders Series» seriyasi uchun esa 250 000 dollar miqdorida to'liq depozit talab etiladi. Ba'zi mijozlar ushbu to'lovni 2017-yilda amalga oshirgan bo'lib, deyarli o'n yildan beri o'z mashinalarini kutmoqda.
Kompaniya rejalariga ko'ra, «Roadster» modelini ommaviy ishlab chiqarish 2027 yoki 2028-yildan oldin boshlanmaydi. Bu loyiha «Tesla» tarixidagi eng murakkab va eng ko'p vaqt talab qilgan ishlanma bo'lib qolmoqda. Hozirda mutaxassislar namoyish paytida hech qanday muammo kelib chiqmasligi uchun ko'plab sinov va tekshiruvlarni amalga oshirmoqda.
Izohlar 0
…