Mashhur Brembo kompaniyasi o‘zining yangi Sensify tormoz tizimini seriyali ishlab chiqarish boshlanganini e’lon qildi. Kompaniya ushbu texnologiyani «aqlli tormozlash»ning yangi standarti deb atamoqda. Tizim birinchi bo‘lib jahonning yetakchi avtomobil ishlab chiqaruvchilaridan birining modelida qo‘llaniladi, biroq brend nomi hozircha sir saqlanmoqda. Bu haqda Ixbt.com xabar beradi.
Sensify tizimining asosiy yangiligi — bir asrdan ortiq vaqt davomida avtomobil tormozlarining asosi bo‘lib kelgan an’anaviy gidravlikadan voz kechishdir. Uning o‘rniga elektromexanik arxitektura joriy etilgan bo‘lib, tormoz kuchlari elektron signallar, aktuatorlar va murakkab dasturiy algoritmlar yordamida boshqariladi. Bunda tormoz disklari va supportlar kabi odatiy komponentlar saqlanib qoladi.
Yangi tizim har bir g‘ildirakni alohida boshqarish imkonini beradi, bu esa klassik tizimlarda mavjud emas. Bu yechim yo‘l bilan tormozlanish sifatini oshiradi, avtomobil barqarorligini ta’minlaydi hamda burilishlarda sirpanish xavfini kamaytiradi. Shuningdek, tizimda tormoz suyuqligi ishlatilmagani sababli texnik xizmat ko‘rsatish jarayoni sezilarli darajada osonlashadi.
Brembo mutaxassislarining ta’kidlashicha, Sensify turli yo‘l sharoitlarida, hatto qoplamasi notekis bo‘lgan yo‘llarda ham boshqaruvni yaxshilashga qodir. Kelgusida ushbu texnologiya ko‘plab avtomobil modellariga o‘rnatilishi rejalashtirilgan bo‘lib, yillik ishlab chiqarish hajmi yuz minglab avtomobillarni tashkil etishi kutilmoqda.
“Zamin”ni Telegramʻda oʻqing!
