Chikagoda politsiyachilar olib qochilgan tez yordam mashinasini 130 km ta’qib qildi (video)

^{Foto: ABC7}
Fox News telekanali Chikagodagi shosselarning birida politsiya vertolyoti yordamida tasvirga olingan videoni e’lon qildi. Kadrlarda tez yordam avtomobili patrul mashinasidan qochayotganini ko‘rish mumkin. Jinoyatchi 100 kilometrdan ortiq masofagacha ta’qib qilib borilgan, deb xabar beradi Motor.

Tez yordam mashinasini Chikagoda yashovchi 46 yoshli shaxs minib qochgan. Voqeadan xabar topgan politsiyachilar zudlik bilan uni ta’qib etishga kirishgan va bu 128 kilometr davom etgan.

Ta’qib davomida patrul xodimlari mashinaning orqa g‘ildiragini teshishga muvaffaq bo‘lgan, biroq bu jinoyatchini to‘xtata olmagan. Politsiyadan qocha olmasligini tushunib yetgan erkak mashinani shossening o‘rtasida to‘xtatgan.

Avvaliga u o‘zini xuddi taslim bo‘layotgandek tutgan. Erkak tiz cho‘kib, qo‘llarini ko‘targan. Ko‘p o‘tmay u yo‘l bo‘ylab qochishga kirishgan. Yo‘l-yo‘lakay u bir nechta avtomobilni to‘xtatishga uringan. Erkakning o‘ylagani amalga oshmagach, bir nechta politsiyachilar va xizmat iti yetib kelib, uni yo‘lga yotqizgan va qo‘llariga kishan taqqan. Erkak xizmat avtomobilini o‘g‘irlash, shuningdek, politsiya xodimlariga qarshilik ko‘rsatishda ayblanmoqda.

Eslatib o‘tamiz, 2021 yilning iyunida Mayamida 14 yoshli yigit Lamborghini Urus’ni minib qochgandi. Yo‘ltanlamas egasi unga skuterda yetib olib, jinoyatchini politsiyaga topshirgan. “Zamin” yangiliklarini “Twitter”da kuzatib boring