Saudiyalik milliarder urush boshlanishida Rossiyaga 500 mln dollar sarmoya kiritdi

^{Foto: Bloomberg}
Saudiyalik milliarder shahzoda Al-Valid Bin Talal Moskvaning Ukrainaga bostirib kirishi paytida Rossiya firmalariga 500 million dollardan ortiq sarmoya kiritdi. Bu haqda Bloomberg xabar bermoqda.

Mazkur sarmoya Fors ko‘rfazi davlatining OPЕK+ hamkori bilan ehtiyotkor siyosiy pozitsiyasini saqlab qolganligining belgisidir.

Birja arizasiga ko‘ra, shahzoda Al-Validning investitsiya firmasi Kingdom Holding kompaniyasi fevral oyida «Gazprom», «Lukoyl» va «Rosneft» tomonidan chiqarilgan depozitar kvitansiyalarni sotib oldi. Rossiya 24 fevral kuni Ukrainaga bostirib kirgan edi.

Bobosi zamonaviy Saudiya Arabistonining asoschisi bo‘lgan Al-Valid mamlakatning eng boy odamlaridan biri hisoblanadi.

Saudiya kompaniyasi 2020 yildan beri global qimmatli qog‘ozlar va depozit kvitansiyalariga 3,4 milliard dollar sarmoya kiritdi.

67 yoshli shahzoda Al-Valid Sitigroup va Apple kabi kompaniyalarda ulushlarni qo‘lga kiritganidan so‘ng eng obro‘li saudiyalik investorlardan biriga aylandi.

Al-Valid uzoq muddatli investitsiyalar bilan tanilgan va mashhur investor Uorren Baffetning muxlisidir. “Zamin”ni Telegramʻda oʻqing!