Foto: TASS
Rossiya prezidenti Vladimir Putin Belarus rahbari Aleksandr Lukashenkoni Ukraina bilan urushga qo‘shilishga ishontira olmagan ko‘rinadi, deb yozadi Amerika urushni o‘rganish instituti (ISW).
Minskdagi uchrashuvda Putin Belarus rahbarini bilvosita tuzatishga ishontira olmay, Lukashenkoning tezislarini qabul qilgandek tuyulgani bu bahoni tasdiqlaydi, deydi tahlilchilar.
ISW ekspertlari hali ham Belarusning Ukrainaga qarshi Rossiya urushida ishtirok etishi ehtimoli past, deb hisoblashyapti.
Rossiya prezidenti matbuot kotibi Dmitriy Peskov avvalroq Putin Lukashenko bilan Belarusning urushda ishtirok etishini muhokama qilmoqchi ekanligini inkor qilgan edi. Kreml bunday ayblovlarni asossiz deb hisobladi.
Urush boshlanishidan bir necha kun oldin ham Peskov xuddi shunday yo‘l tutgan va Putinning Ukrainaga bostirib kirish niyatini qat’iyan rad etgandi, ammo Rossiya prezidenti matbuot kotibining hozirgi so‘zlari, ehtimol, Putinning Lukashenkoni urushga jalb qilish istagini yashirishga urinishdir. Bu boradagi sa’y-harakatlar esa muvaffaqiyatsizlikka yuz tutdi, deydi tahlilchilar.
Bundan oldin Putin va Lukashenko harbiy hamkorlik tafsilotlarini oshkor qilgandi.
Belarus Rossiya tomonidan berilgan S-400 uzoq masofali havo mudofaa tizimini jangovar navbatga qo‘ydi, shuningdek, raketalari yadroviy kallakni olib yurishi mumkin bo‘lgan «Iskander» kompleksini oldi.
Bu haqda Aleksandr Lukashenko Rossiya prezidenti Vladimir Putin bilan Minskda bo‘lib o‘tgan muzokaralar yakunlari bo‘yicha ma’lum qildi. Fevral oyida u S-400 tizimlari Minsk yaqinida «Kiyevda, Varshavadan tashqarida va hokazolarda nima bo‘layotganini ko‘rish uchun» joylashtirilishi mumkinligini aytgan edi.
Bundan tashqari, Moskva va Minsk muntazam harbiy mashg‘ulotlar amaliyotini davom ettirishga kelishib oldilar va rossiyalik mutaxassislar, xususan, yadroviy kallaklarni tashish uchun qayta jihozlangan Belarus samolyotlari ekipajlarini tayyorlaydi.
Ctrl
Enter
Xato topdIngizmi
Iborani ajratib Ctrl+Enter tugmasini bosingMavzuga oid yangiliklar
