12:30 / 22.02.2023

Ukraina tashqi ishlar vaziri: G‘arb yetarlicha harakat qilmadi

^{Foto: Getty Images}
Bryusselda Ukraina-NATO-Yevropa Ittifoqi formatidagi birinchi uchrashuv bo‘lib o‘tdi. Uning asosiy maqsadi Kiyev va uning hamkorlari o‘rtasida muvofiqlashtirishni yaxshilash va qurol xarid qilish tartiblarini soddalashtirish bo‘ldi.

Ukraina tashqi ishlar vaziri Dmitriy Kuleba 21 fevral, seshanba kuni NATO bosh kotibi Yens Stoltenberg va Yevropa Ittifoqi diplomati Jozep Borrel bilan o‘tkazgan qo‘shma matbuot anjumanida G‘arbning yordami Ukraina uchun yetarli bo‘lmadi, dedi. «Agar biz g‘alaba qozonganimizda va o‘shanda men shu yerda turgan bo‘lganimda, men: ha, yetarli narsa qilindi, deb aytgan bo‘lardim. Bu sodir bo‘lmaguncha - yetarli emas», dedi u.

Kulebaning so‘zlariga ko‘ra, bu urush bunchalik uzoq davom etishini hech kim kutmagan va o‘q-dorilar taqchilligi masalasi birinchi marta yoz oxirida ko‘tarilgan. O‘shandan beri ularning ishlab chiqarilishi kengaytirildi, ammo logistikada yangi muammolar aniqlandi. «Qurol ishlab chiqaruvchilar va xaridorlar o‘rtasida bo‘shliq aniq bo‘ldi, - dedi vazir. - Ya’ni - protseduralar yo‘qligi va bu qanday ishlashi kerakligini tushunish».

Uning so‘zlariga ko‘ra, texnik darajada qurol xarid qilish zarur samaradorlik bilan amalga oshirilmayotgani ma’lum bo‘ldi, shu sababli Ukraina-NATO-Yevropa Ittifoqi o‘rtasida uch tomonlama uchrashuv tashkil etilgan. Bu, birinchi navbatda, qurol sotib olish va front chizig‘iga yetkazib berish uchun logistika jarayonlarini tezlashtirishga yordamga mo‘ljallangan bunday formatdagi birinchi uchrashuv. Ukraina tashqi ishlar vazirligi rahbari buni «Ikkinchi jahon urushidan keyingi eng yirik logistika operatsiyasi» deb atadi.

Yens Stoltenberg Ukrainadagi urushning hozirgi bosqichini yana bir bor «yo‘q qilish urushi» va «logistika jangi» deb ta’rifladi. O‘z navbatida, u Ukrainaga harbiy yordamni oshirishga va’da berdi va Kiyevga qurol yetkazib berish majburiyatini olgan davlatlar zudlik bilan ularni bajarishi, shuningdek, o‘q-dorilar ishlab chiqarishni ko‘paytirishi va qurol xarid qilish tizimini takomillashtirishi kerakligini ta’kidladi.