«Isroil davlati katta xavf ostida»: namoyishchilar Netanyaxu qarorgohiga buzib kirishmoqda
Sud-huquq islohotini tanqid qilgan mudofaa vaziri ishdan olinganidan keyin Isroilda tartibsizliklar avj oldi. Namoyishchilar Netanyaxuning Quddusdagi uyidan 20 metr narida joylashgan nazorat-oʻtkazish punktini buzib oʻtishga muvaffaq boʻldi.
Minglab namoyishchilar Isroil bosh vaziri Binyamin Netanyaxuning Quddusdagi qarorgohi oldida sud-huquq islohotlariga qarshi toʻplanishdi.
Netanyaxu mudofaa vazirini lavozimidan chetlatgach, Isroilning koʻplab shaharlarida norozilik namoyishlari boshlandi.
YNet ma'lumotlariga koʻra, Tel-Avivdagi namoyishchilar Ayalon shossesini (Isroilning eng yirik avtomobil yoʻli) har ikki yoʻnalishda ham toʻsib qoʻygan, avtomobil shinalarini yoqib, barrikadalar oʻrnatishmoqda.
Netanyaxu qarorgohi joylashgan Quddusdagi Azza koʻchasida yana mingga yaqin namoyishchi toʻplangan. «Kan-11» telekanalining xabar berishicha, bosh vazir qarorgohi yaqinidagi nazorat-oʻtkazish punktini buzib oʻtgan namoyishchilarga politsiya suv purkagichlar bilan qarshilik qilmoqda.
Muxolifat etakchisi va sobiq bosh vazir Naftali Bennet Netanyaxuni mudofaa vazirini ishdan boʻshatish haqidagi buyrugʻini qaytarib olishga va sud-huquq islohotini toʻxtatishga chaqirdi.
«Isroil davlati katta xavf ostida. Kim haq, kim nohaq ekanligi muhim emas. Men barcha namoyishchilar va Isroil fuqarolaridan zoʻravonlik ishlatmaslikni, qon toʻkmaslikni soʻrayman», dedi Bennet.
“Zamin” yangiliklarini “Telegram”da kuzatib boring
