NATO Ukrainaga ko‘p yillik yordam dasturini ishlab chiqadi

^{Foto: Reuters}

Shimoliy Atlantika alyansi Ukrainaga yordamni oshiradi, dedi uning bosh kotibi Yens Stoltenberg 4 aprel, seshanba kuni Bryusselda Ukraina-NATO komissiyasi yig‘ilishidan so‘ng. Unda alyans a’zolari va hamkorlari Ukrainaga nafaqat harbiy, balki iqtisodiy va moliyaviy yordamni qanday kuchaytirishni muhokama qildi. Umuman olganda, ular allaqachon Kiyevga 150 milliard yevro miqdorida yordam ko‘rsatishgan, shundan 65 milliardi harbiy yordamdir, deya eslatdi Stoltenberg.

Ukraina tashqi ishlar vaziri Dmitriy Kuleba Ukraina-NATO komissiyasi formatidagi uchrashuv deyarli 6 yil ichida birinchi marta o‘tkazilganidan mamnuniyat bildirdi. «Ko‘ryapmanki, biz nafaqat uni blokdan chiqarishga muvaffaq bo‘ldik, balki Vilnyusdagi sammit chog‘ida Ukraina prezidenti ishtirokida bunday uchrashuvni o‘tkazish istagi ham katta», — dedi u uchrashuvdan keyingi brifingda. Ukraina TIV rahbarining so‘zlariga ko‘ra, bu nafaqat muhokama, balki ittifoqchilar va Kiyev uchun muhim qarorlar qabul qilish mexanizmidir.

Ko‘p yillik yordam paketini ishlab chiqish NATOning «mamlakat Yevroatlantika oilasiga, ittifoqimizga yaqinlashishini kafolatlash» uchun Ukrainaga uzoq muddatli sadoqatini ko‘rsatib berishi kerak, dedi uning bosh kotibi. Ushbu dastur tashqi tajovuz oldini olish va Ukraina mudofaasini ta’minlashi, shuningdek, Ukraina Qurolli kuchlari va NATO mamlakatlari armiyalari o‘zaro ta’sirini ta’minlashi va Ukrainaning alyans doktrinasiga, jihozlari va standartlariga o‘tishiga yordam berishi kerak.

Kuleba tushuntirishicha, dastur NATOning Ukrainaga keng qamrovli yordam paketini qo‘shimcha mustahkamlashdir. «Bu NATO imkon qadar kuchli va qudratli qilmoqchi bo‘lgan amaliy yordam mexanizmi. Shu bilan birga, Ukrainaning NATOga a’zo bo‘lishi bo‘yicha siyosiy qarorlar qabul qilish jarayoni davom etmoqda», - dedi u va bu yordam a’zolik o‘rnini bosuvchi yoki mamlakatning ittifog‘ga kirishi sharti bo‘la olmasligini qo‘shimcha qilib o‘tdi.

TIV rahbari 11-12 iyul kunlari Vilnyusda bo‘lib o‘tadigan sammitda Kiyevning NATOga a’zoligi bo‘yicha aniq qarorlar qabul qilinishini kutmoqda. «Bu sammitning vazifasi - qog‘ozda nimanidir tuzatish, ammo bu Ukrainani NATOga a’zolikka yaqinlashtiradigan qarorlar bo‘lishi kerak, - dedi u. - Biz Ukraina-NATO munosabatlari holatini to‘g‘rilaydigan yechimlarni qidirmayapmiz. Vaziyat oldinga siljishi kerak».

«Biz Putinning bosqinchilik urushi davom etayotganini ko‘ryapmiz, lekin Ukraina Qurolli kuchlari, xalqi va rahbariyati jasoratini ham ko‘rib turibmiz, - dedi NATO bosh kotibi. - Rossiya tajovuzkorligi va ittifoqchilar o‘z yordamlarini qanday kuchaytirayotganiga guvohmiz». Stoltenberg Shimoliy Atlantika alyansidagi ittifoqchilar va hamkorlar Kiyevga og‘ir zirhli texnikalar, zamonaviy jangovar tanklar yetkazib berayotganini ma’qulladi va bundan buyon ham yordam taqdim etishga va’da berdi.

O'zbekiston yangiliklari Yangiliklar