4 iyunda 75 yoshida olamdan ko‘z yumgan afsonaviy bokschi Muhammad Alining tobuti u o‘sib-ulg‘aygan ona shahri Luisvill ko‘chalari bo‘ylab olib o‘tildi, deyiladi "Kun" nashrida. Alining tobutini bokschilar Mayk Tayson va Lennoks Lyuis, aktyor Uill Smit (bokschi haqidagi "Ali" filmida uning rolini ijro etgan), farzandlari olib o‘tdilar. Dafn marosimida, shuningdek, Alining butun oilasi: 9 farzandi, uning hozirgi va ikki nafar sobiq rafiqalari ham ishtirok etdilar. 17 ta mashinadan iborat kortej bokschining yoshligi o‘tgan uydan qabristongacha boks bilan shug‘ullangan mashg‘ulot zali, Muhammad Ali muzeyi, Muhammad Ali xiyoboni orqali 19 mil masofani bosib o‘tdi.
Dafn marosimida 15 ming kishi ishtirok etdi. Sportchining qabr toshiga qisqacha "Ali" degan yozuv o‘yib tushirildi.
Muhammad Ali 4 iyunda 75 yoshida vafot etdi. Sportchi 1984 yildan beri Parkinson kasalligidan aziyat chekib kelardi. Ali tarixdagi eng mashhur professional bokschilardan biri, 1960 yilgi Olimpiada g‘olibi, o‘ta og‘ir vaznda mutlaq jahon chempioni (1964–1966, 1974–1978), "Yil bokschisi" unvonining 5 karra sohibi va "O‘n yillik bokschisi" unvoni sohibi hisoblanadi. 1999 yilda "Asr sportchisi" deb tan olingan. Ali o‘z faoliyati davomida 61 ta jang o‘tkazib, undan 56 tasida g‘alaba qozongan, 5 tasida mag‘lubiyatga uchragan.
“Zamin”ni Telegramʻda oʻqing!
Ctrl
Enter
Xato topdIngizmi?
Iborani ajratib Ctrl+Enter tugmasini bosing 
