Ukrainada korrupsionerlar haqidagi ma’lumotlar barcha uchun ochiq qilib qo‘yildi

^{Aleksandr Novikov}
^{Foto: Rbc.ua}

Ukrainaning Korrupsiyaning oldini olish bo‘yicha milliy agentligi (NAZK) korrupsiyaga oid huquqbuzarliklarni sodir etgan jismoniy va yuridik shaxslarning maxsus reyestrini ko‘rishni barcha uchun ochiq qilib qo‘ydi. Bu haqda agentlik rahbari Aleksandr Novikov ma’lum qildi.

NAZK ma’lumotlariga ko‘ra, shaxslarning yagona davlat reyestri korrupsiyaga oid huquqbuzarliklarni sodir etgan barcha jismoniy va yuridik shaxslar to‘g‘risidagi ma’lumotlarni o‘z ichiga olgan portaldir. Reyestr 2019 yil fevral oyida yaratilgan.

“NAZK xavfsizlik jihatlarini hisobga olgan holda korrupsiya va korrupsiya bilan bog‘liq huquqbuzarliklarni sodir etgan shaxslar reyestrini ko‘rishni barcha uchun ochib qo‘ydi. Milliy agentlik Ukraina Mudofaa vazirligidan reyestrga kirishda hech qanday xavf yo‘qligi haqida javob oldi”, — dedi Novikov.

Qayd etilishicha, Ukrainada o‘tgan yilning fevral oyidan boshlab harbiy holat joriy etilishi munosabati bilan reyestrga kirish cheklangan edi. Novikovning so‘zlariga ko‘ra, reyestr ma’lumotlariga kirishning barcha uchun qayta ochilishi “jamoat manfaati” bilan bog‘liq bo‘lib, “korrupsiyaga qarshi kuchli vosita”dir.

Ro‘yxatga olish kitobida biror yuridik shaxsning korrupsiyaga oid huquqbuzarlik uchun javobgarlikka tortilgani yoki tortilmagani to‘g‘risida ma’lumotnoma olish mumkin. Milliy agentlik mansabdor shaxslar maqomi to‘g‘risidagi elektron deklaratsiyani tiklashni nazarda tutuvchi qonun loyihasining parlament tomonidan qabul qilinishini kutmoqda, deya tushuntirdi Aleksandr Novikov.

Yangiliklar