Armaniston rasman Tog‘li Qorabog‘ni Ozarboyjon hududi deb tan oldi

^{Foto: AFP}

Armaniston bosh vaziri Nikol Pashinyan Yevropa siyosiy hamjamiyatining Granada (Ispaniya) sammiti doirasida Ozarboyjonning 86,6 ming kv.km. hududini tan olish to‘g‘risidagi deklaratsiyani imzoladi. Bu haqda Yevropa Kengashi press-relizida aytiladi. Ozarboyjonning bu hududi Tog‘li Qorabog‘ yerlarini o‘z ichiga oladi.

Deklaratsiya Yevropa Kengashi prezidenti Sharl Mishel, Fransiya prezidenti Emmanuel Makron, Germaniya kansleri Olaf Shols va Armaniston bosh vaziri Nikol Pashinyan tomonidan imzolangan.

«Tomonlar Armaniston va Ozarboyjon o‘rtasidagi munosabatlarning yaxshilanishi, suverenitetni, chegaralar va Armaniston hududi (29800 kv.km.) va Ozarboyjon hududi (86600 kv.km.) daxlsizligini tan olish tarafdori», deyiladi deklaratsiyada.

Ozarboyjon rahbari Ilhom Aliyev sammitda ishtirok etmadi. Ozarboyjonning APA agentligi diplomatik manbaga tayanib, tomonlar Turkiyaning sammitda ishtirok etishiga ruxsat bermagani uchun Ozarboyjon muzokaradan bosh tortganini xabar qildi.

Biroq, keyinroq Ozarboyjon prezidenti yordamchisi Hikmat Hajiyev Ozarboyjon prezidenti Bryusselda Armaniston va Yevropa Ittifoqi bilan uchtomonlama muzokaralarga tayyor ekanini aytdi.

19-20 sentyabr kunlari Ozarboyjon qo‘shinlari Tog‘li Qorabog‘ hududini «aksilterror choralari» natijasida to‘liq nazoratga oldi. Tan olinmagan Tog‘li Qorabog‘ Respublikasi 2024 yil 1 yanvardan o‘z faoliyatini to‘xtatadi – bu farmonni uning prezidenti Samvel Shahramanyan imzolagan. Qorabog‘ qurolli kuchlari ham tarqatib yuborildi.

Tog‘li Qorabog‘da yashagan 125 mingga yaqin aholining ko‘pchiligi hududni tark etib, Armanistonga o‘tdi. BMT ma’lumotlariga ko‘ra, mintaqada ulardan 50 dan 1000 ga yaqin arman qolgan.

Шухрат Раззаков

«ZAMIN.UZ» muharriri