Emomali Rahmon tojikistonlik amaldorlarga kamida ikkita chet tilini o‘rganishni buyurdi

^{Foto: Flickr}
Tojikiston prezidenti Emomali Rahmon respublikaning barcha viloyatlari sudyalarini lavozimidan ozod qilish va tayinlash to‘g‘risidagi farmonni imzoladi hamda yangi kadrlar bilan uchrashuv o‘tkazdi.

Uchrashuv chog‘ida u kasbiy mahoratni oshirish, milliy qonunlar va xalqaro huquq normalarini o‘zlashtirish, tilni bilish kabi masalalarga e’tibor qaratdi.

Shu bilan birga, prezident har bir davlat xizmatchisi davlat tilini yuqori saviyada bilishi, shuningdek, kamida ikkita chet tilini bir xil darajada bilishi shartligini ta’kidladi.

Shu munosabat bilan adliya tizimi xodimlariga va barcha davlat xizmatchilariga chet tillarini chuqur o‘rganish uchun bir yil muddat berish, ushbu talablar bajarilmagan taqdirda ularga nisbatan zarur choralar ko‘rish topshirildi.

«Vijdonli va halol, xushmuomala bo‘ling, chunki jamiyatda inson xalqqa xolis xizmat qilish orqaligina izzat va hurmatga erisha oladi», dedi Tojikiston prezidenti davlat xizmatchilariga. “Zamin” yangiliklarini “Telegram”da kuzatib boring