Rossiya armiyasi Ukrainaning Avdiyivka shahri kirish qismini egalladi

^{Foto: Anadolu Agency}
Rossiya qo‘shinlari Donetsk viloyatining Avdiyivka shahriga asosiy kirish yo‘lini egallab oldi. Rossiyaning «harbiy muxbiri» Yevgeniy Poddubniy tomonidan 15 fevral kuni e’lon qilingan videoda ko‘rsatilgandek, shaharning shimoliy chekkasida Rossiya bayrog‘i o‘rnatildi.

Videoning geolokatsiyasiga ko‘ra, yaqin atrofda shahar nomi yozilgan stela bor. Avvalroq, uning yonida ukrainalik harbiylar suratga tushishgan, 2023 yil dekabr oyi oxirida esa Ukraina prezidenti Volodimir Zelenskiy video yozib olgan edi.

Ukrainaning DeepState loyihasi, o‘z navbatida, rus qo‘shinlari Avdiyivka shimoli va janubida oldinga siljiganini xabar qildi. DeepState xaritasida Poddubniyning videosida ko‘rsatilgan hudud rus qo‘shinlari tomonidan ishg‘ol qilingani belgilangan.

Rus qo‘shinlari egallab olgan yo‘l bo‘ylab Avdiyivkadagi Ukraina harbiylarining asosiy ta’minot chizig‘i o‘tadi.

Avdiyivka Ukraina qurolli kuchlarining Donetsk chekkasidagi muhim istehkomidan biri. Rossiya qo‘shinlari 2023 yil oktyabr oyidan buyon shaharni o‘rab olishga harakat qilmoqda. “Zamin” yangiliklarini “Telegram”da kuzatib boring