Pokistonda maktab o‘qituvchisini o‘ldirgan ikki ayol o‘lim jazosiga hukm qilindi

^{Foto: Reuters}
Pokistonda maktab o‘qituvchisini shakkoklikda ayblab o‘ldirgan ikki nafar ayol o‘lim jazosiga hukm qilindi. Bu haqda Al Jazeera nashri xabar berdi.

Xabarda aytilishicha, qotilligi isbotlangan ayollarning biri 23, boshqasi 24 yoshda bo‘lgan. Ayollarga jinoyatda sherik bo‘lgan voyaga yetmagan bola esa umrbod qamoq jazosiga hukm qilingan.

Manbada aytilishicha, jinoyat 2022 yilning mart oyida Xayber-Paxtunxva viloyati shimoli-g‘arbidagi Dera Ismoil Xon shahrida sodir etilgan. Maktab o‘qituvchisi Safura Bibi pichoq zarbidan vafot etgan.

So‘nggi 2 yil davomida qotillik ijrochilarini aniqlashning imkoni bo‘lmagan. Uzoq davom etgan tergovlardan so‘ng, politsiya 2024 yilning mart oyi boshlarida aybdorlarni aniqlashga muvaffaq bo‘lgan.

Aybdorlar o‘z jinoyatlarini marhum o‘qituvchi ularning dini va e’tiqodiga nomuvofiq gaplar gapirgani, shakkoklik qilgani bilan asoslagan. Ayollar tergovdan keyin o‘qituvchini oldin kaltaklab, keyin pichoq bilan yaralab o‘ldirganini tan olgan.

Pokistonda o‘lim jazosiga qonunan ruxsat berilgan. Ammo sudlar bu jazoni qo‘llashdan odatda o‘zlarini tiyishadi. Mamlakatda so‘nggi qatl hukmi bundan oldin 2020 yilda amalga oshirilgan edi. “Zamin” yangiliklarini “Telegram”da kuzatib boring