Berlindagi Apple do‘koniga qizil bo‘yoq sepib ketishdi

^{Foto: Google Images}
Berlindagi Apple do‘koniga noma’lum shaxslar qizil bo‘yoq sepib, “Free Congo” yozuvini yozib ketishdi. Bu haqda Bild nashri ma’lum qildi.

Nashrning yozishicha, hujumchilar fasadga teskari qizil uchburchakni ham chizishgan.

Voqea do‘kon ochilishidan oldin sodir bo‘lgan. Teskari qizil uchburchak, deb yozadi gazeta, ko‘pincha HAMAS harakati tarafdorlari tomonidan qo‘llaniladi. Do‘kon oynalariga bir nechta plakatlar yopishtirilgan.

Voqea sababi, ehtimol, Kongoda kon sanoatining Apple manfaati yo‘lida kengayishi bo‘lgan, deb ta’kidlaydi Bild. Xususan, Kongoda uyali telefonlar ishlab chiqarish uchun zarur bo‘lgan xom ashyo — kobaltni qazib olishda xavfli mehnat sharoitlari mavjud. “Apple, Tesla va boshqa kompaniyalar foyda ko‘radi, Kongo aholisining 70 foizi esa o‘ta qashshoqlikda yashaydi”, deb ta’kidlaydi ekologiya faollari.

Berlin politsiyasi allaqachon 32 yoshli gumonlanuvchini hibsga olgan. Uning sherigi qochishga muvaffaq bo‘lgan va huquq-tartibot idoralari xodimlari tomonidan qidirilmoqda. “Zamin”ni Telegramʻda oʻqing!