Turkiya Ukraina masalasida vositachilik qilishga tayyorligini ma’lum qildi

^{Foto: Google Images}
Ukrainadagi mojaroning mintaqadan tashqariga tarqalish xavfi mavjud. Bu haqda Turkiya tashqi ishlar vaziri Xoqon Fidan Anqaradagi matbuot anjumanida aytib o‘tdi.

“Ukrainadagi mojaro mintaqadan tashqariga ham tarqalishi mumkin va yadro qurolidan foydalanish xavfi bor”, — dedi u.

Fidan, shuningdek, Turkiyaning Ukrainada vositachilik qilishga tayyorligini va mojaroni tinch yo‘l bilan tezroq hal etish tarafdori ekanligini bildirdi.

“Biz imkon qadar tezroq tinch yo‘l bilan kelishuv bo‘yicha muzokaralarni boshlash muhim, deb hisoblaymiz va vositachilik sa’y-harakatlarini qilishga tayyormiz”, dedi Turkiya TIV rahbari.

Bundan tashqari, Fidan Turkiyaning Ukraina mustaqilligi va hududiy yaxlitligini saqlash tarafdori ekanini ta’kidladi.

“Bu urushni zudlik bilan to‘xtatish kerak. Biz bu urush sabab qutblanishni ko‘ryapmiz. Biz Rossiya o‘z lagerini yaratishga intilayotganini kuzatyapmiz. Yevropa xavfsizlik arxitekturasi doirasidagi munosabatlar boshqacha rivojlanmoqda. Urush davom etayotgan bir paytda u yoki bu xavflar qanday formatda rivojlanishini oldindan aytib bo‘lmaydi”, — dedi turk vaziri.

Turkiya Ukrainadagi vaziyatni tinch yo‘l bilan hal qilish bo‘yicha muzokaralar uchun o‘z hududini berishga tayyorligini bir necha bor bildirgan. Anqara ijobiy tajriba sifatida 2022 yil martida Istanbul muzokaralari va o‘sha yilning iyul oyida g‘alla bo‘yicha bitim tuzilganini tilga oladi. “Zamin” yangiliklarini “Facebook”da kuzatib boring