Tel-Aviv ma’muriyati tanqidiy pozitsiyasi sabab Rashida Tolibning Isroilga kirishini man etgan.
24 iyul kuni Isroil bosh vaziri Binyamin Netanyahu AQSH Kongressida ma’ruza qildi. Haagadagi Xalqaro mahkama prokurori tomonidan G‘azo sektorida qirg‘in sodir etishda ayblanib, qamoqqa olinishi talab etilgan siyosatchining Qo‘shma Shtatlar qonunchilik idorasida nutq irod qilishi ko‘p sonli demokratlar tomonidan boykot qilindi.
Netanyahu o‘z ma’ruzasida G‘azo sektoridagi qatliomlarni oqlashga uringan. Qariyb bir soatlik nutq mobaynida AQSH qonunchilari Isroil bosh vazirini o‘nlab marta qarsak va olqishlar bilan qo‘llab-quvvatlagan.
«Newsweek» jurnali xabariga ko‘ra, zalda o‘tirgan deputatlardan birgina Rashida Tolib Netanyahuga o‘ziga xos tarzda norozilik bildirgan. Asli falastinlik siyosatchi yahudiy davlati bosh vaziriga qarata «Harbiy jinoyatchi», «Qatliom aybdori» kabi jumlalar yozilgan peshlavha ko‘tarib turgan.
«Isroilning aparteidchi hukumati falastinliklarga qarshi genotsid sodir etmoqda. Ammo ular falastinliklarni yo‘q qila olmaydi», – deb yozgan Rashida Tolib ijtimoiy tarmoqlardagi sahifasida.
Kongressning Vakillar palatasi a’zosi Rashida Tolib prezident Jo Baydenning Falastin–Isroil ziddiyatidagi pozitsiyasini tanqid qilib keladi. Unga ko‘ra, Isroil HAMASning xatti-harakati uchun G‘azoda yashovchi ko‘p ming sonli aholini jazolamoqda. Bayden ma’muriyati esa Isroilni bir tomonlama dastaklagani holda, bomba yomg‘iri ostida qolayotgan oddiy falastinliklar taqdiriga qayg‘urmayotir.
Buyuk Britaniyaning «The Guardian» gazetasi yozishicha, AQSH kongressmenlari Netanyahuni tik oyoqda olqishlayotgan bir paytda Vashington ko‘chalarida Isroilning G‘azo sektoridagi zo‘ravonlik siyosatiga qarshi norozilik namoyishlari bo‘lib o‘tgan.
Asli yahudiy millatiga mansub senator Berni Sanders G‘azodagi qirg‘in boshida turgan Netanyahuga Kongressda minbar berilganini keskin tanqid qilgan. «Amerika tarixida ilk bor harbiy jinoyatchi shunday sharafga noil etilmoqda», – degan Sanders.
Jahon axborot agentliklari xabariga ko‘ra, Netanyahu Kongressda nutq so‘zlayotgan paytda Isroil armiyasi G‘azo sektorini bombardimon qilishda davom etgan. Yahudiy davlati harbiylari HAMAS hujumiga javoban G‘azo sektoriga bostirib kirgan 2023 yil 7 oktyabrdan buyon 39145 nafar falastinlik halok bo‘lgan. Ularning salmoqli qismi begunoh bolalardir.
«The Lancet» jurnali ma’lumotlariga qaraganda esa, so‘nggi 9 oy davomida halok bo‘lgan falastinliklar soni 186 ming kishidan ortadi.
Xalqaro tashkilotlar Isroil armiyasini qurollantirayotgan birinchi raqamli mamlakat – AQSHdan qurol-aslaha yetkazishni to‘xtatishni talab qilmoqda. Oxfam hamda Human Rights Watch inson huquqlari tashkilotlari Isroil bombardimonlarida minglab falastinlik tinch aholi vakillari o‘ldirilganini qayd etib, Tel-Aviv Vashington tomonidan yetkazilayotgan qurollardan xalqaro huquq me’yorlari doirasida istifoda etishini savol ostiga olgan.
Jahon matbuoti xabariga ko‘ra, xalqaro hamjamiyat e’tiroziga qaramay, AQSH Isroilni goh imi-jimida, goh oshkora qurollantirishda davom etmoqda. “Zamin” yangiliklarini “Telegram”da kuzatib boring
Ctrl
Enter
Xato topdIngizmi?
Iborani ajratib Ctrl+Enter tugmasini bosingMavzuga oid yangiliklar
Namangan hokimi xorijda ishlayotgan yoshlarga o‘zlariga mos ish o‘rinlari taklif qildi
Messini, Xavini va meni yo‘qotib, “Barsa” katta xato qildi
Sog‘liqni saqlash vazirligi jaziramadan ehtiyot bo‘lishga chaqirdi
Braziliya sohillari yaqinidagi akulalar organizmidan kokain topildi
O‘zbekiston va Qirg‘iziston Qadamjo-Shohimardon yo‘nalishidan birgalikda foydalanishni rejalashtirmoqda
Ishchanlik qobiliyatini yaxshilaydigan mahsulotlar ma’lum qilindi
Latviya Rossiya bilan chegarada “ajdar tishlari” ni o‘rnatishni boshladi
O‘zbekiston qancha meva–sabzavot eksport qilmoqda?
