Qirg‘izistondan O‘zbekistonga noqonuniy olib o‘tilayotgan 34 bosh ot to‘xtatib qolindi

^{Foto: akipress}
Qirg‘izistonning O‘sh viloyatida Milliy xavfsizlik davlat qo‘mitasi xodimlari va O‘zgan tumanining Ko‘k-Tosh uchastkasi chegara xizmati xodimlari tomonidan 34 bosh yilqini O‘zbekistonga o‘tkazishga uringan kontrabandachilar qo‘lga olindi.

Milliy xavfsizlik davlat qo‘mitasi matbuot xizmatining xabar berishicha, 16 avgust kuni gumonlanuvchi B.T.J. O‘zbekiston fuqarosi bo‘lgan Habibulla ismli shaxs bilan kelishib, O‘zgan shahridagi chorva bozoridan 24 bosh ot sotib olgan. U 80 ming qirg‘iz so‘mi (taxminan 12 million o‘zbek so‘mi) evaziga muhandislik inshootlari mavjud bo‘lmagan hudud orqali hayvonlarni O‘zbekistonga noqonuniy olib kirishga uringan.

Shuningdek, Oqsuv tumani Qora-Tobo qishlog‘ida sodir bo‘lgan voqea joyida 1999 yilda tug‘ilgan K.B. ham qo‘lga olingan. U 10 bosh otni O‘zbekiston hududiga olib o‘tmoqchi bo‘lgan.

Qirg‘iziston qonunchiligiga ko‘ra, olib qo‘yilgan 34 bosh ot davlat foydasiga musodara qilinadi. Jonivorlar davlat chegarasini qo‘riqlashda foydalanish uchun Chegara xizmati balansiga o‘tkaziladi. “Zamin” yangiliklarini “Twitter”da kuzatib boring